Switch Foundation tin basta tempo sin lansa un documentario Pa motibo cu nan tabata ocupa cu otro proyectonan. Sinembargo e aña aki nan ta bin bek cu tres. Den un entrevista cu e directora Paula Nahr, e ta conta Bon Dia Aruba tocante e topiconan pa e documentarionan aki.

“Pa cuatro aña caba nos no a saca un documentario, pero esey no kiermen nos no tabata activo cu otro proyectonan. Pero pa 2017, nos no tin solamente tres documentario so, nos tabay bin cu algun videonan tutorial educativo pa comunidad tambe.” Nahr ta splica. E ta conta cu e tres documentarionan lo toca temanan di traficacion humano, pobresa y prevencion di abuso mucha.
Comunidad mester informacion
Nahr ta conta den mas detaye: “Pa e documentario di traficacion humano, nos tin e primicia di un victima Americano cu a pasa den esaki y a wordo sexualmente explota esta Shamere Mckenzie. Na December 2016 el a bin Aruba y a comparti su storia cu nos. E enfoce di e documentario lo ta riba con pa preveni y con pa wak señalnan di traficacion humano. Esun tocante abuso di mucha lo basa su mes riba con por lesa cambio di actitud den un mucha cu ta wordo abusa ya cu tin diferente tipo di abuso. Den nos comunidad tin un preocupacion grandi tambe pa e leynan cu no ta stricto suficiente y cu no ta haci practicamente nada te hasta ora e culpabel wordo haya. Y finalmente e documentario di pobresa, e diferente tipo di pobresa cu tin y con tin ora hende mes ta hiba nan mes na pobresa pa motibonan cu no ta precisamente necesario”

Otro cos mas, lo ta videonan tutorialnan educativo cu lo comparti informacion riba con pa anda cu diferente problemanan como por ehempel, muchanan cu tin problema di actitud.
Nahr ta conta, cu locual mas ta inspira su persona pa bin bek cu e documentarionan ta cu e ta wak e interes den comunidad pa locual ta trata e informacion cu documentarionan di Switch ta trece dilanti.

Switch Foundation
Manera ya ta conoci Switch Foundation a lansa na 2011 manera un proyecto multimedia y a produci Switch TV cual un serie di documentario dinamico cu ta splica con problema familiar por afecta un comunidad completo. E punto central pa capta atencion di comunidad cu contenido educacional. Ta combina investigacion cu dramatisacion di testimonio nan. Poesia, fotografia, y obra teatral tur ta parti di e contenido.