Minister di Husticia y Asunto Social, Rocco Tjon, ayera mainta durante un conferencia di prensa a anuncia un proyecto piloto entre e compania Setar y Cuerpo di Polis di Aruba pa loke ta trata body camera pa agentenan di polis uniforma, cu ta bay duna na nan mas seguridad na momento di haci nan trabao.

Manera ta conoci, den e plan di maneho di Ministerio di Husticia y Asunto Social nan a scoge pa inverti den tecnologia pa eleva seguridad pa comunidad y den esey, Tjon a señala cu a inverti hopi den camara y den sistema sofistica manera radar pa aumenta seguridad na frontera. Pero tambe henter e proyecto di ICT pa henter e cuerpo policial pa nan por haci nan trabao miho y brinda un miho servicio na comunidad.

E biaha aki a scoge pa eleva seguridad di e mesun agentenan di polis y den e caso aki un di e proyectonan cu ta den proceso ora tur cuerpo policial haya vehiculonan nobo ta e Mobile Data Terminals, cu ta forma parti di esaki, ademas di e proyecto piloto cu ta bay inicia hunto cu Setar pa loke ta e uso di body camera cu polisnan uniforma cu ta constantemente riba caya como K9Unit, surveillance dients, Motor Unit, etc.

 

E motibo di esaki segun e mandatario a splica ta debi cu cientificamente ta proba cu uso di body camera ta influencia e comportamento di e ciudadano. “Y si nos wak diferente investigacion cientifico cu a conduci na Merca, Inglatera pero tambe na Hulanda, nos ta wak cu esaki ta encera mas seguridad pa agente policial, nos ta wak cu kehonan cu ta entrega contra organisacionnan policial y particularmente riba agentenan policial ta baha alrededor di 88% den cierto organisacionnan na Merca, na Inglatera cu 60% pa loke ta uso di agresion contra e agente di polis; y uso di forsa di parti di e agentenan tambe, mirando cu ora e ciudadano sa cu agente tin un body camera e ta influencia nan comportacion den sentido cu e situacion no ta escala.”

El a considera cu e resultadonan di e investigacionnan cientifico aki ta hopi importante specialmente na Hulanda ora cu esaki a keda implementa, na unda a conclui cu ora tin un situacion cu a ‘bay for di man’ contra e agentenan di polis, e agentenan mes cu ta usa e camara ta indica mediante encuesta cu nan ta sinti mas sigur y e agresion contra polis ta menos.

Banda di esaki, minister Tjon a sigura cu ademas di sirbi pa e seguridad di polis, e pruebanan di e material di e camara tambe ta importante ora un caso ta presenta na corte.

“Esaki ta un paso hopi importante, aworaki alto comisario, prome cu esaki keda introduci, ta bay percura pa tur e maneho keda stipula pa agentenan policial mes, di e manera con ta bay usa e camaranan, con e imagennan ta bay keda warda, ki ora por usa nan y ki ora nan por proporciona esaki tambe.”

Ora e proyecto cuminsa, despues di tres pa seis luna ta bay evalua esaki y e ora ey ta bay tuma e decision si ta bay ekipa full cuerpo di polis cu e camaranan aki. Na e momentonan aki a haci un sondeo, manera minister Tjon a declara, y door di alto comisario di cuerpo policial ta bay tuma e decision di cua ta ekipo y districto cu ta bay ekipa cu e proyecto piloto aki; y mirando e sondeo aki nan a dicidi hunto cu Setar pa adkiri 28 camara y despues di tres pa seis luna lo evalua esaki.

El a sigura cu si tin e fondonan suficiente pa por inverti den otro proyectonan y nan a scoge haci un proyecto piloto pa no cuminsa cu full e Cuerpo Policial pa por evalua e resultadonan di esaki, wak kico ta e puntonan cu mester mehora y ora nan dicidi implementa den full e Cuerpo Policial, por garantisa cu ta bay ta exitoso.

Igualmente, el a trece dilanti cu ora e proyecto di body camera a keda introduci na otro paisnan tambe tabatin cierto resistencia door di e agentenan policial mes, y debi na esey, prome cu nan a cuminsa cu e proyecto aki nan a haci un sondeo den Cuerpo Policial pa haya sa kico ta ekiponan cu tin balor agrega y nan a scoge pa esaki.

Minister Tjon a comenta cu e comportamento di comunidad tabata diferente 30 of 40 aña pasa y debi na esey mester a cuminsa inverti den nan agentenan policial pa loke ta e parti di training, duna nan e hermentnan necesario pa nan por eherce nan trabao y garantisa nan mesun seguridad. “Mi ta compronde cu mester garantisa seguridad di nos comunidad, pero si nos no inverti den esnan cu mester percura pa seguridad, esaki ta bay bira hopi dificil y p’esey ta e tipo di proyectonan aki ta importante y lo keda inverti no solamente den e parti di material pa tambe den e parti di training pa Cuerpo Policial por haci nan trabao miho.”

Ademas di esey, el a informa cu na juni ta bay cuminsa un opleiding dirigi na Cuerpo Policial y otro partner di e cadena hudicial cu ta bay enfoca con pa atende cu ta sufri por ehemplo, di e parti di salud mental, esaki ta bay ta un curso nobo cu hunto cu Hulanda y Boneiro nan a hinca den otro pa por brinda e parti aki na agentenan policial.

Di su parti, Ronica Lopez den representacion di Setar a anuncia cu recientemente nan a informa di un colaboracion cu Cuerpo di Polis di Aruba pa implementacion di un gran cantidad di camara rond di e isla enfocando riba siguridad di turistanan den bario di Palm Beach na districto di Noord, tambe nan a anuncia cu nan ta colaborando pa un stacion di monitor nobo na Savaneta na unda nan ta bay tin e curason di incorporacion di data cu ta drenta rond di tur e camara rond di e isla cu ta bay ta maneha door di un ekipo central.

Pa loke ta trata implementacion di e body camara di e agentenan, Lopez a expresa cu Setar ta colabora cu Motorola den esaki y tambe den implementacion di e otro camaranan den barionan, nan ta guia e proyecto y tambe ta train e ekipo di agentenan cu ta bay haci uso di e body camara.

Den specificacionnan, el a splica cu ta camaranan di ultimo modelo unda e audio y video ta den formato HD y cu na momento cu tin un investigacion cu mester mira detayenan esaki ta posibel, tambe nan tin GPS incorpora cu ta necesario pa wak unda e precies e agentenan ta ubica y e bateria ta graba durante un periodo di 12 ora.

E informacion di e camara ta ‘encrypted’, esey ta nifica cu ni un otro persona por tin acceso na e informacion cu tin den dje lo cual tambe ta refleha un grado halto di siguridad pa cu esaki.