Pa aclaria inkietud cerca empleadonan: Gerencia di Serlimar lo duna presentacion riba structura nobo

Diaranson ultimo, directiva di sindicato STA a reuni cu gerencia di Serlimar riba e ultimo desaroyo cu ta tumando luga den e compania estatal pa locual ta trata e cambio di ley cu Serlimar Suis Generis ta bay conoce. Y tambe e proceso di cambio cu ta tumando luga durante e ultimo lunanan.

Presidente di STA, Diego de Cuba a declara na e matutino aki cu den e reunion nan a elabora ariba e organogram nobo cu e compania ta bay conoce. Es decir e structura nobo di e compania, y tambe nan a papia tocante structura salarial nobo conforme cu lo wordo introduci, segun e sindicalista. Ta asina cu diamars awor, gerencia di Serlimar hunto cu STA y nan representantenan lo tene un reunion general cu tur e empleadonan rond di e organogram aki y con e structura nobo ta hinca den otro, pa aclaria cualkier inkietud cerca e empleadonan.

Structura nobo
De Cuba a splica cu e motibo pakico STA a solicita e reunion aki ta debi cu basta tempo caba nan a ricibi copia di e structura nobo di e compania y nan kier a delibera cu gerencia riba dje. Durante e reunion aki, e gerente Sr. Henley Davelaar a duna un splicacion amplio di e structura nobo di e compania. STA ta para tras di gerencia di Serlimar pa loke ta e structura nobo aki.

“Nos ta kere cu despues di hopi tempo cu e compania tabata den un situacion no mucho bunita, aworaki nos ta mira cu ta bon cu un structura organisa,” el a bisa.

De Cuba a remarca cu den e structura salarial nobo, e empleadonan ta bay conoce adelanto den nan condicion di trabou pronto. El a agrega cu den e situacion actual tin hopi empleado ‘cu ta tranca’ y cu ta pega pa hopi aña caba. STA kier mira nan progresa den e compania y den nan salario tambe.

Sinembargo, el a laga sa cu tin hopi empleado cu no tabata contento cu e manera con a implementa e structura aki den Serlimar. De Cuba a bisa cu hustamente nan a reuni cu e delegadonan di Serlimar y tambe cu nan abogado, pa sinta na mesa cu gerencia di e compania estatal nan por a discuti ariba e tema aki.

Reunion informativo
Locual a trece pa dilanti ta cu STA ta kere cu ta mas prudente pa e compania convoca un reunion general cu tur empleado, pa splica nan e cambionan detayadamente.

E reunion aki ta bay sosode diamars venidero, dia 24 di september. E dia ey, sindicato STA hunto cu su delegadonan lo sinta atrobe cu gerencia di Serlimar pa e presentacion di e structura nobo di e compania. Presidente di STA ta spera cu e presentacion lo ta un bon escenario pa e trahadonan bin cu pregunta y expresa nan inkietud. Serlimar su gerencia ta dispuesto pa duna splicacion necesario ariba esaki.

STA a keda contento cu e reunion ultimo cu gerencia y tambe di e ultimo desaroyo den e compania cu a haya un flota nobo di truck. Nan a haya alrededor di 18 truck, y ademas e campaña cu nan ta hibando ‘ta uno hopi agresivo y hopi bon,’ segun De Cuba.

Igualmente e tin cu bisa cu mirando e servicio cu nan ta bin dunando na comunidad Arubano, nos por wak un diferencia. E ta spera cu diamars awor tur e puntonan aki lo bin dilanti y keda detayadamente splica. Tambe kico ta e plannan pa futuro, ‘no pa e compania so, sino pa e empleadonan tambe’, segun e sindicalista.