Durante un conferencia di prensa, minister Otmar Oduber a bisa cu pa otro siman dialuna, e grupo cu a haci peticion di tereno na aña 2008 y 2009 lo ta na turno, un total di 611 persona.

Oduber (POR) a bisa cu for di momento cu a cuminsa su maneho na mei aña pasa, e proceso pa aplica pa haya un pre- reservering pa yega na firma di acta, ta un periodo di 12 pa 14 luna. Segun e mandatario, aña pasa esunnan cu a entrega documento mas lihe a logra, pero a sinti e peso di e aña aki.

Actualmente un cantidad di 487 peticion a logra haya un reserva y pasa screening anterior, ta un 30% di e aplicacionnan. Ta tratando cu e grupo mas bieu, mirando cu tin grupo cu ta wardando 12 pa 20 aña pa haya un tereno. Fuera di e screening, tin esunnan cu a casa y tin tereno cu a cumpra of a logra un erfpacht caba.

Tambe tin e grupo cu ta wardando pa aña largo y ta dificil pa yega na un financiamento di banco. Pa es motibo, 30% a cualifica pa haya e reservering, ‘nos tin 218 cu a pasa e acto’.

E cifra, segun Oduber, ta importante y lo sigui crece den añanan binidero.

E intencion ta pa caba e peticion di 2008 te cu 2012 pa fin di aña, pa actualisa completo. “Den menos cu 10 aña, mas porcentahe ta bay subi pa loke ta trata cantidad di persona cu si por y ta interesa pa haya tereno y cumpli cu tur condicion”, Oduber a expresa.

E maneho husto pa tur hende por ‘crea nan hogar’, unda hende cu ta pasa nan acta mester cu tin e hypotheek di biaha. El a menciona cu segun maneho anterior, hende tabata haya tereno cu nan acta di notario, pero no tabata construi nada pa añanan largo.

Oduber a bisa cu actualmente den tur bario tin construccion ta tumando luga. Lo haci control cerca hende cu a ricibi tereno den pasado cu no a cumpli cu exigencia. Awo ta sigurando pa nan traha nan cas.

Segun e maneho nobo, persona cu entrega peticion pa tereno lo ser atendi sin importa color, di ki bario ta bin, ki color di partido. Tur hende ta yega na remarca pa haya tereno ‘semper y cuando cumpli cu rekisitonan’.

Segun e mandatario, si hende tin interes den registracion na diferente bario, lo ta creando barionan nobo pa asina traha cas. Tin 1,100 parcela adicional. Un total di 2,400 parcela otorga pa proyecto cu ta bezig cune.

E barionan cu ta habriendo ta Pos Chikito, Turibana, Sabana Liber, Jaburibari, Boroncana, Sero Colorado, Koyari, Calabas, Macuarima, Yara, Tanki Leendert, Tanki Flip, Palm Beach, Papilon, San Barbola, Eagle y tereno na San Nicolas.

Oduber ta gradici e 4 departamento cu ta traha hunto, DIP, DOW, Cadaster y DNM cu a bay hunto for di december pa e duna e permiso na hende cu tin e tereno, pa wak e balor di naturalesa cu mester proteccion, sea mata, specialmente rond di e tereno cu ta mas di 750 meter cuadra, pa asina por cuminsa construi y rosa. Sea ta un tereno priva of di gobierno, departamento DNM lo ta envolvi.

Segun e mandatario, e meta ta pa den 4 aña por logra cu henter e lista di DIP, ‘fin di periodo 2021’ unda cu tin mas o menos 4,000 pa 4,500 cas cu lo ta den construccion y por logra tin e lista cla, pa hende cu peticion nobo no mester warda mas.

Tur persona cu kier haci peticion pa cuminsa for di 2021 por haya contesta pa nan tereno. “Haya un tereno di gobierno ta un derecho, no un obligacion. E obligacion di un ciudadano ta pa por cumpli pa traha bo cas y crea hogar.”

E mandatario a informa tambe cu lo cuminsa cu planea pa vivienda vertical. Nan ta bay anuncia pa proyecto piloto na Seroe Colorado pa crea oportunidad pa ‘flatgebouw’, ya cu segun e ta bisa, no tin suficiente tereno pa duna pa horizontal, pues ‘nos tin cu bay ariba’.

Pa finalisa, e mandatario a aclara cu e prome 30 dia no ta pa haya e financiamento, pero un carta di e instituto financiero, sea banco of FCCA, pa asina nan por wak entrada cu e persona of pareha tin, pa asina bin na remarca pa haya tereno.

Esey no ta e hypotheek di e prestamo cu mester pa e cas, sino e proceso si nan ta cay na remarca, pa wak cuanto nan por haya pa traha un cas. “E ora practicamente 9 luna pa pasa acta na notario pa pasa e hypotheek. Locual ta haya pa 30 dia ta un carta pa indicacion. Pero ta logra den 9 luna pa prepara tur documento y keda cla.”