Pa 2020 ATA tin cu cremencha su gastonan di mercadeo: Gobierno mester di 35 miyon di roomtax

Gobierno den su reto pa logra un presupuesto 2020 cu un surplus di 25 miyon, ta evaluando diferente alternativa pa genera mas entrada. Gabinete Wever-Croes desde cu a drenta ta kere cu turista mester aporta un tiki mas na caha di gobierno; y asina purba di evita e peso di mas belasting riba nos comunidad.

Nan ta purba di busca tur caminda pa cera e deficit financiero y produci un suma adicional of surplus. Un di nan ta via aumento di roomtax, cu ta loke e turistanan ta paga den hotel. Pero prome minister Evelyn Wever-Croes ta haya cu e opcion aki no ta uno faborabel, ya cu Aruba ta hopi caro caba. Sinembargo e ta haya cu si Oficina di Turismo di Aruba (ATA) por baha su gasto, gobierno lo por haya mas di loke actualmente nan ta hayando pa concepto di e roomtax destina pa mercadeo y promocion.

Wever-Croes a splica cu roomtax ta trece alrededor di 100 miyon florin pa aña. Sinembargo e placa aki no ta bin na caha di gobierno, sino cu e ta bay pa ATA pa e instancia aki por cubri su gasto di mercadeo y promocion. Sinembargo nan a pidi ATA pa hala faha mara y baha mas posibel su gastonan, ya cu loke ta resta di e placa aki ta bay pa gobierno. Esaki en bes di aumenta e roomtax.

Ultimo aña e suma cu gobierno a haya a varia. E ta calcula cu si eventualmente ATA ta bay haya 100 miyon, y nan ta realisa gasto di alrededor di 90 miyon florin pa mercadea e producto turistico Aruba, loke ta resta pa gobierno ta 10 miyon. Pero e aña aki gobierno kier haya 35 miyon florin pa asina por cumpli cu presupuesto 2020. “E aña aki nos no por cu 10 miyon so. Nos tin cu haya 35 miyon pa nos caba di cera e buraco financiero un poco mas,” el a bisa.

E aña aki ATA mester percura baha nan gasto di mercadeo y promocion na 65 miyon florin. E prome mandatario ta reconoce cu no ta un tarea facil. Nan a yega di sinta na mesa cu ATA, cu tambe a considera cu no ta facil pa reduci e gasto aki di un forma drastico asina. Pero e prome mandatario ta puntra su mes: Ki opcion nos tin?

Gobierno kier evita bati porta di pueblo cu mas belasting. E ta kere cu e opcion mas factibel ta pa bisa ATA cu pa e aña aki nan tin cu cremencha y reduci nan gasto pa asina mas placa di ATA por bay pa caha di gobierno.

Potret di AHATA.