Aruba Ports Authority (APA) ta informa cu nan ta contento cu e resultadonan di 2016 y ta pronostica cu 2017 lo yega un record di bishitante di mas di 700 mil turista crucero.

E cifra menciona por ta un tiki menos, segun APA,  si bin cancelacion na ultimo ora pero otro banda e por hasta surpasa e pronostico menciona. E cifranan ta basa riba reservacionnan cu e lineanan crucero a haci caba caba via agencianan.

Humphrey Tromp, Director Financiero di APA, ta duna di conoce cu aña 2016 a cera como un bon aña si haci un comparacion cu cifranan di algun aña atras. E cifra cu a cera cu ne den 2016 tabata di 656.043 pasahero crucero, surpasando loke a premira pa 2016 cual tabata rond di 640 mil pasahero cu a spera despues cu Pullmantur a cancela pa lunanan di zomer. Pa locual ta e cantidad di pasahero den comparacion cu aña pasa ta significa un aumento di 8.1%.

No solamente e cantidad di pasaheronan di barco a conoce un aumento, pero tambe e cantidad di barconan cu a yega haf di Aruba a aumenta, sr. Tromp ta splica. Na 2015 a ricibi 296 barco crucero, y na final di 2016 por bisa cu a ricibi 307 barco crucero. Sinembargo e ta bisa na mesun momento cu e cantidad di barconan no ta bisa mucho, ya cu e barconan crucero cada bes ta bira mas grandi. Por ehempel den pasado tabatin mas barco pero e tamañonan tabata mas chikito. Awendia e barconan ta birando mas grandi, treciendo na mesun momento mas reto pa APA.

P’esey a pone riba e presupuesto nobo di e compania, pa haci trabounan di mantencion riba e canal cu ta uza pa e barconan drenta nos haf.  Fuera di e trabounan di limpiesa di e canal lo coba tambe na algun parti di e canal pa haci e area mas profundo pa por ricibi barconan di crucero di tamaño mas grandi compara cu algun aña atras.  E ta nifica tambe cu e infrastructura di haf di Oranjestad lo ta prepara pa ricibi barco mas grandi cu ta ricibiendo na e momento aki.

Tambe e ta splica cu aworaki ta sintando na mesa cu ATA pa papia riba loke ta e servicionan cu kier brinda mas na e pasaheronan crucero na momento cu nan yega Aruba  cu mester ta uno optimal. “APA ta percura pa e infrastructura, pero tin mas cos cu mester ofrece na e turista na momento cu e pisa suela di Aruba. Esaki ta algo masha importante. Pues ta papia con taxistanan, operadornan di tour, restaurantnan, etc., ta anda cu e bishitantenan. Tambe e sorto di tour y calidad di tournan cu ta disponibel. Ta hopi aspecto mester tene cuenta cu ne. Mester pensa riba e cantidad maximo di turista cu nos por permiti pa asina duna un servicio optimal.”

Cambio di infrastructura
Den cuadro di e ariba menciona, APA a tuma e decision cu no por trece cambio grandi den e infrastructura actual. Solamente ta haci e cambionan pa por ricibi barconan mas grandi. Por ehempel, el a bisa, si antes por a pone 3 pa 4 barco di 3 mil pasahero, si awo pone 2 barco di 5 mil ya caba tin 10 mil pasahero. Y si pone tres barco di 4 mil, e ta bira 12 mil pasahero, cual lo trece un congestion pisa. Ta riba aspectonan aki mester bin deliberacion entre tur partidonan den e sector pa yega na un consenso riba loke lo por permiti maximalmente riba un solo dia.