Ayera durante un conferencia di prensa di minister di Salubridad y Turismo Dangui Oduber a keda conoci cu e prome profesionalnan Arubiano den area di cuido a keda inclui den e registro di Arubig.

Oduber a expresa cu pa prome biaha den historia nan ta oficialisa Arubig lo cual segun el a indica ta un proceso cu a cuminsa algun añanan caba ora nan a drenta na gobernacion na aña 2017 na unda nan a cuminsa cu diferente investigacion pa wak con nan por percura pa realisa un soño cu hopi Arubiano tabatin pa reconoce nan den e region y asina nan por drenta den registro y por traha na Aruba.

El a splica cu nan a cuminsa traha cu e landsverordening beroepen in de gezondheidzorg pero esaki no tabata completo y ehecucion practico no tabata existi y for di e ley aki nan a cuminsa haci tur e trabao cu tin mester di haci pa asina percura tin e decretonan pa e organonan di acreditacion y tambe e opleidingseisen cu ta hopi importante manera Oduber a señala.

Tambe el a bisa cu nan a institui un comision nacional di cuido conhuntamente cu e area na unda cu un di e preocupacionnan cu a wordo treci dilanti na e tempo ey tabata e calidad di cuido cu tabatin preocupacion caminda e nivel di cuido mester ta ekivalente cu esun di Hulandes e Big Registratie.

“Mi ta kere cu den esey DVG a haci un excelente trabao conhuntamente cu e conseheronan di ministerio pa haci tur e investigacionnan necesario pa nos por tin un calidad di mesun nivel cu e registro di Big y ta p’esey cu awe nos ta oficialisa e proceso aki por medio di duna e decreto oficial na e prome profesionalnan cu ta wordo inclui den nos registro”, Oduber a declara.

El a informa cu nan lo traha cu organonan di acreditacion di diferente paisnan pero principalmente cu Hulanda, Merca, Canada, Colombia y Costa Rica.

E organo di acreditacion na Costa Rica cu nan lo haci uso di dje ta Sistema Nacional de Acreditacion de la Educacion Superior (Sinaes) di Colombia lo ta Consejo Nacional de Acreditacion (CNA) pa dentista nan lo haci uso di National Dental Examining Board, Educational Commission for Foreign Medical (ECFMG) y tambe di Joint Commission on National Dental Examinations.

Tocante e profesionnan cu por cuminsa registra caba den e registro di Arubig ta boticarionan, mediconan, specialistanan, dentistanan, parteranan y fisioterapista, si tur cos cana manera cu nan tin proyecta den luna di januari di 2022 enfermeronan, psicologo y psikiatranan lo inclui den registro aki.

“E logro aki ta uno grandi y historico pa pais Aruba na unda cu pa prome biaha nos ta bay reconoce oficialmente nos yiunan di tera cu a sigui specialisa den region y cu esaki ta bay brinda oportunidadnan nobo pa nan”, Oduber a comenta.

Despues di esaki e studiantenan no lo tin mester di haci su specialisacion na Hulanda na unda cu esey tabata e caso anteriormente y cu awor por bay specialisa na Costa Rica, Colombia, Canada of na Merca, ademas di esey Oduber a menciona cu nan a institui un instituto di calidad cu segun el a sigura, ta importante pa motibo cu e lo mester bira un organo independiente di Salud Publico, na e momentonan aki e ta resorta bao e departamento.

Pa cu esaki, el a expresa cu nan ta den combersacionnan cu director di hospital Jacco Vroegop y AZV pa asina yuda cuminsa e instituto di calidad cu lo bay determina kico ta standard y e nivel di cuido cu nan kier pa Aruba.

“No tabata facil pa yega akinan, hopi minister di Salud den pasado a papia di Arubig y awe ta pone echonan na e palabra cu nos a logra awe di tin nos propio profesionalnan di un manera simbolico cu ta registra den registro di Arubig”, el a afirma.

Di su parti Jayburtt Dijkhoof di departamento di instituto di calidad a informa cu na e website www.dvg.aw/arubig tur profesional por drenta pa yena e formulario, wak e rekisitonan y di e manera ey entrega nan peticion y por registra na Arubig, el a bisa cu pa 15 di november di e aña aki ta e fecha cu tur persona na Aruba cu ta traha como boticarionan, mediconan, specialistanan, dentistanan, parteranan y fisioterapista mester registra den Arubig pa por sigui eherce nan funcion.

Dijkhoof a conta cu despues di un proceso largo di 13 aña nan a yega na e punto aki hunto cu diferente gabinetenan na unda nan logra crea un contexto pa Aruba cu ta amplia fuera di Hulanda, Canada, Merca Colombia y Costa Rica.

Director di AZV, Edwin Jacobs a informa cu 20 aña pasa ora cu AZV a keda introduci, den ley ta specificamente formula cu un di e metanan di AZV ta cu e tin cu stimula y percura pa tin un cuido accesibel pa aseguradonan, “awe na momento cu ta introduci e Arubig aki cu ta mara na dje, instituto di calidad ta bay ta pa formalisa den prome biaha den historia di cuido na Aruba e parti aki di calidad”, Jacobs a bisa.

For di algun tempo caba segun el a declara, nan ta expresa nan preocupacion pa e sostenibilidad di e seguro den futuro y esey ta nifica sostenibilidad financiero den sentido cu demanda pa cuido ta bay ta aumentando den proximo añanan cu ta hayando impulso door di e envehecemento di e poblacion y manifestacion di malesanan cronico y cu pa paga esaki lo bay ta un reto grandi.

Sostenibilidad di persona ta un otro punto di preocupacion manera Jacobs a comenta y caminda cu e demanda di cuido ta bay crece asina hopi cu ta bay tin mas profesionalnan ainda pa nan por atende e demanda di cuido aki.

“Nos tin falta di profesionalnan y no solamente akinan sino na otro paisnan di occidente cu tin e problema di envehecemento” el a afirma.