Segun e institucion Britanico di cooperacion internacional, Oxfam International, e ministronan di Union Europeo a kita e teritorionan Britanico Bermuda y Barbados, y e teritorio Hulandes Aruba di e lista preto di UE di ‘tax havens’ sin cu esaki tabata hustifica.

Chiara Putaturo, Oxfam su asesor di politica di UE riba impuesto y desigualdad, a bisa:

“Gobiernonan di EU – atrobe – a laga atrobe algun di e tax havens mas malo ‘off the hook’. E reformanan acorda pa Bermuda, Barbados y Aruba lo no stop nan di opera como tax havens. Nan lo continua ofreciendo regimen fiscal agresivo y ‘corporate tax rates’ (winstbelasting) hopi abao o hasta cero, cu ta facilita evasion na gran escala di impuesto y lo encurasha un competencia dañino den direccion di e nivel mas abao di winstbelasting.

“EU mester hisa su criterionan y ‘blacklist’ tur hurisdiccion cu ta ofrece tasa hopi abao of cero mes di winstbelasting. Tax havens ta horta di paisnan na Europa y di henter mundo den desaroyo e entradanan di impuesto cu nan mester pa inverti den servicio publico manera scol y clinica, y ta hende comun y coriente – particular hende muhe – cu ta pagando e prijs.”

E ministronan di finanzas Europeo a kita na maart ultimo e tax havensnan di Panama, Hong Kong, Isle of Man, Guernsey y Jersey di e lista preto y e lista ‘shinishi’ di UE.

Bermuda, Barbados y Aruba a sali di e lista preto, pero Bermuda y Barbados a keda riba e lista shinishi (anticipando cumplimento), mientras Aruba a sali di ambos lista.

E informe di Oxfam yama “Off the Hook” publica na maart 2019, ta splica pakico e proceso di pone riba lista preto no ta apto y ta yuda faborece cierto di e tax havens di mundo.

‘Off the Hook’ a haya tambe cu cinco estado miembro di UE, Cyprus, Irlanda, Luxemburg, Malta y Hulanda, lo mester aparece riba e listanan di UE di tax havens, si aplica e criterio di UE na nan.

Parlamento Europeo a haci un yamado na Comision Europeo pa formalmente reconoce e cinco miembronan aki di UE como tax haven.

Comision Europe o y Parlamento Europeo a pusha pa bin cu formanan fiscal mas progresista den ultimo añanan. Sin embargo, e estadonan miembro a nenga consistentemente di acorda reformanan necesario, incluyendo propuestanan pa harmonisa reglanan fiscal den henter UE (un base comun di impuesto riba ganashi consolida) o medida diseña pa aumenta transparencia di impuesto riba ganashi (reportahe publico di pais pa pais) .