Diabierna pasa, minister di Husticia Andin Bikker hunto cu miembronan di varios instancia a firma un acuerdo ministerial cu tin di haci cu situacion cu parehanan na Aruba ta pasa aden ora nan ta den proceso di divorcio, y cu proteccion di nan yiunan na e momento ey.

Minister a expresa cu den e casonan aki lamentablemente tin biaha cu e victimanan ta mucha menor di edad y nan a sinta studia pa lunanan largo y haci un esfuerso pa yega na un solucion, y a haci un estudio tocante e solucionnan busca den otro hurisdiccion, incluyendo Hulanda.

Hulanda tin un ley cu ta yama ‘Wet bevordering voortgezet ouderschap’, un ley cu ta promove paternidad continuo, introduci pa basta aña caba y cu a surgi tambe den cuadro di tratadonan internacional pa derecho di mucha.

E decreto ministerial aki ta pa formalisa y oficialisa un comision cu ta bay consisti di Michella Steenvoorde – Lacle presidente di e comision, Bert Wielenga director interino, Aisca Berkmeyer como secretario y Daphne Tecklenborg como miembro. Nan ta encarga cu e preparacion di e ley aki.

Michella Steenvoorde – Lacle a splica cu alrededor di november 2018 el a propone esaki na minister Bikker, pa bin cu un herment pa yuda e muchanan cu den cierto caso ta keda sin debido atencion ora nan mayornan ta bay separa.

El a trece dilanti cu esaki ta relaciona cu derecho cu mucha tin cu ta hancra den derechonan di Nacionnan Uni. E comision ta bay concentra riba entre otro articulo cu ta referi na bienestar di mucha, cu mester ta prioridad den cualkier decision cu ta tuma y cu ta concerni e mucha.

El a duna di conoce cu pa esaki, nan tin pensa pa presenta dos instrumento, ‘Wet bevordering voortgezet ouderschap’ y di ‘zorgvuldige afweging’ cu a presenta na 2009 na Aruba, a evalua esaki na 2012 y ya caba e tempo ey por a mira cu tin cierto beneficio, entre otro a bin mas acuerdo tocante mucha y mayor.

E ley ta encera cu prome cu e mayornan separa nan mester sinta hunto y traha acuerdo concreto, tambe tocante educacion di nan yiu, e palabracion aki ta forma un ‘plan di mayor’ of ‘ouderschapplan’ cu ta un convenio cu nan ta cera encuanto nan yiu pa pone esaki(nan) central, poniendo nan problema di pareha un banda y enfoca riba e mucha, kico nan ta bay tin mester pa e por experiencia e separacion lo miho posibel.

Aparte di esaki, Steenvoorde – Lacle a expresa cu e ley aki ta conta cu hopi beneficio, pero tambe ta atende cierto critica, por ehempel di defensornan di mucha, cu tabatin recomendacionnan. Tambe otro personanan a pidi pa bin, aparte di e herment aki, cu e plan di mayor, cu un cuerpo preventivo di mediacion di famia; esakinan ta persona specialisa den mediacion di famia cu lo guia e personanan pa por yega na e plan di mayor.

Pa por wak si na Aruba nan lo bay haya e mesun suerte cu a haya na otro paisnan cu a introduci e herment aki, Steenvoorde – Lacle a comenta cu na e paisnan ey a mira un aumento di tata cu a pidi autoridad paterno comparti (‘gezamenlijk gezag’) riba nan yiunan. Tambe a bin menos proceso legal cu tabatin d haci cu mucha. Pa nan por midi cu di berdad esakinan ta efecto cu Aruba tambe ta bay conoce, nan mester conoce e situacion actual, asina nan por haya cuanto mucha tin cu tin mayor separa.

Pa cu esaki nan lo tin cooperacion di Centraal Bureau voor de Statistiek Aruba (CBS), cu lo presenta un estudio pa nan por sa unda nan lo cuminsa. E tarea di e comision lo bay ta pa sa kico precisamente nan lo kier midi y con nan ta bay midi esey. Nan lo haya consideracion di expertonan local y tambe di e situacion local.

Di su parti, Desiree Helder director di CBS a manifesta cu nan lo forma parti di e comision y cu awor nan a cuminsa delibera ki tipo di pregunta esencial nan mester tin, pa nan por stipula e maneho corecto pa por yuda mucha y tambe e mayornan.

Helder a informa cu ya caba nan a cuminsa cu e proceso pa traha e cuestionario cu nan mester y cu kisas pa luna di maart nan lo duna e resultado di e investigacion aki, nan lo acerca instancianan di gobierno cu tin informacion cu nan mester hinca den e investigacion. Tambe a confirma cu nan lo kier haci un encuesta entre mayor y muchanan pa haya informacion di loke nan ta pasa aden.