Otro tormenta den glas di awa? Arubadag na Hulanda ta asina importante?

Aña 2016 a habri cu un conflicto den e partido den gobierno cu a bay para te na oficina di Gobernador. Finalmente esaki a resulta un ‘tormenta den un glas di awa’, manera traduccion di e expresion Hulandes aki lo ta na Papiamento. Gobernador a haya un carta di retiro condiciona, di cual te awe pueblo di Aruba por solamente adivina loke tabatin aden. Pero si e protagonistanan mes ta bisa cu tur cos ta O.K. atrobe, ken nos ta pa cuestiona esey?

No a dura mucho pa nos yega na e siguiente incidente den e lucha den partido aki, unda e ministro encarga cu Turismo ta hunga un papel estelar. E biaha aki e pelea no a cuminsa directamente entre colega ministro, pero entre e ministro y un miembro di prensa cu ta conoci como ‘casi vocero’ di gobierno. E critica riba e ministro lo tabata concerni placa malgasta cu celebracion di Arubadag na Hulanda. Straño ta cu no a ni duna oposicion chens, manera ta custumber, pa critica e malgastamento di placa di tur aña, unda un cantidad di hende ta bay celebra, pa gobierno haya paga di nos placa di belasting. Y esey mientras e celebracion na Aruba mes mester keda mas importante, pasobra ta aki ta Aruba, punto. Cu tur respet pa nos Arubianonan na Hulanda, pero ta crea e impresion pa hopi aña caba, cu e celebracion na Hulanda ta mes of hasta mas importante cu esun na Aruba, y esey no ta corecto. En todo caso, manera den tur otro cos, cualkier gasto exagera no ta hustifica.

E pregunta grandi ta, pakico e critica aki riba e ministro encarga cu Turismo ta surgi, mientras conhuntamente e ministronan tin aña aden aña afo ta celebra na grandi na Hulanda, sin cu esey a haya critica interno. E critica externo – di oposicion – por t’ey o laga di t’ey, di tur manera no ta haci caso di nan, pero awor diripiente cacho berde ta come cacho berde… Esaki por ta indicacion cu por wel di a huma pipa di paz luna pasa, pero e dolornan aparentemente a sigui di ambos banda.

E cuestionamento no a keda na e asunto di Arubadag so, pero a pasa na cuestionamento di empresa den cual supuestamente e ministro lo tin participacion, durante e rueda di prensa di ayera duna pa e ministro, pa clarifica e asunto. E confrontacion entre ministro y e reportero concerni a bira asina fuerte, cu e ministro a declara dilanti prensa presente cu e ta bay hiba e persona aki corte pa difamacion. Si esey ta sucede, nos lo haya sa automaticamente ora yega asina leu. Como medio di comunicacion serio nos mester bisa cu, si no tin prueba di esey, no ta lanta acusacion. Cu un persona cerca di e ministro ta opera un of mas empresa, esey riba su mes no tin nada straño cun’e, basta e no ta ocupa un puesto publico. Tanten no tin prueba palpabel cu e ministro tin participacion aden, ta prudente abstene di acusacion.

Pero tabatin mas cos. E ministro a vocifera tambe cu keto bay tin e asunto rond di otorgamento di tereno pa construccion di hotel, cu ainda ta tuma luga sin cu e ta na altura, mucho menos duna su aprobacion. Den e cuadro aki el a mustra riba e importancia di e ley pa regula acomodacion all-inclusive, cu ta contene ademas otro regla tambe pa cu permiso pa hoteleria. Su preocupacion tabata concerni tambe e rosamento di e tereno dilanti Divi Phoenix, di cual e no tabata na altura den nomber di ken e rosamento a tuma luga. Atrobe un caso di cu e man drechi no sa kico e man robes ta haci… Tambe e ministro a critica e hecho cu, mientras e ta purba di hiba un maneho di mehora calidad di hotel na Aruba, tras di su lomba otro colega ta otorga permiso pa tereno pa hotel cu no ta cay den e categoria visualisa pa su ministerio. Aki mester bisa cu e ministro tin argumento na su fabor. Aparentemente e caso di Ocean Z ta nada mas cu e ‘tip of the iceberg’.

Ta berdad tambe cu e ley actual no ta duna mucho posibilidad pa pone criterio solido pa hotel. E unico criterionan cu tin den ley awor ta trata di higiena, nada mas. Cu e agravante cu e ministro encarga cu Salubridad Publico, cu ta maneha e Ordenanza di Permiso, bao di cual e permiso pa hotel ta cay, tin poco instrumento den man pa realmente evalua un hotel. Ta bira tempo pa bin cu un ley bon balansa cu ta atende e problematica aki na un manera satisfactorio. Aki interes personal no mester hunga un papel.

Pero bolbiendo na e incidente cu a habri e editorial aki: ta dificil pa kere cu, despues di tur e turbulencia cu a resulta un ‘tormenta den un glas di awa’, ta pone ambiente den gobierno na riesgo atrobe pa un simpel biahe pa Hulanda. Kico tin mas, nos lo haya sa pronto.