Otro tereno publico ta keda rosa sin cu ta tene cuenta cu tin regla. Y ciudadanonan preocupa a manda potret pa Bon Dia Aruba, con a rosa un tereno basta grandi, na e otro banda di e beach di Arashi.
Locual Bon Dia Aruba por a saca afo, cu esun cu a duna e instruccion, no tabatin e permiso pa rosa. DIP no a duna e asina yama aanlegvergunning, cu ta un condicion prome cu por rosa terenonan mas grandi cu 750 meter cuadra. E exigencia aki ta mara den e ROPv y tambe ta maneho di DIP pa varios aña caba, sinembargo, poco hende ta realmente consciente di e exigencia aki.
E aanlegvergunning ta basa riba e hecho cu Direccion di Naturalesa y Medio Ambiente ta haci su analisis di e flora y fauna presente y ta duna conseho kico por kita. Si tin matanan protegi riba e tereno, tin condicionnan cu mester cumpli cune prome cu por haci cualkier movecion riba e tereno. E aanlegvergunning ta un di e hermentnan cu tin pa por yuda scapa particularmente matanan cu ta core peliger di desaparece for di Aruba.
For di DOW a compronde cu e rosamento tabata parti di un disputa, pero no a bin mas informacion. DIP a informa cu aki no ta trata di un tereno propiedad (eigendom) ni tampoco un tereno cu ta keda den e area natural y cu no ta trata di un proyecto, aunke cu e ta keda den e zona cu ta permiti actividad turistico.
Pero mirando cu no tin e aanlegvergunning, e persona of compania mester bay restaura e tereno mas tanto posibel. No a papia di duna multa. Bon Dia Aruba no a haya contesta riba e pregunta ken a haci e acto, ni si tin plan pa e tereno en cuestion.
Bon Dia Aruba a tuma contacto cu Prome Minister, Evelyn Wever Croes, kende ta encarga cu Infrastructura y for di su despacho a compronde cu Sra. Wever Croes “a keda desagradabelmente sorprendi pa e acto y mesora a manda autoridad pa tuma accion, pasobra no tin aanlegvergunning.”
