Otro situacion na unda hende kier pone lama como propiedad priva

Ayera tardi por a tuma nota di un publicacion di un usuario di Facebook, caminda el a publica un potret na unda por mira cu un cas, cu ta keda dilanti lama, a pone un aviso indicando cu e pida tera su dilanti, esta e lama, ta propiedad priva y cu no por pasa.

Ta importante pa remarca cu na Aruba tur lama ta publico y esaki ta skirbi den ley. E ley tin e nomber ‘Landsverordening openbare wateren en stranden’ (Ordenansa nacional awanan publico y nos playanan).

“Pida beach cu a keda pa e pueblo di Savaneta cu por landa y mayoria bes aki hopi hende di edad ta landa. Y awor pa sorpresa nan ta encontra aviso cu e beach y lama ta propiedad priva. No por,” e usuario a publica hunto cu e potret.

Segun el a menciona den e publicacion, ta trata di un beach cu ta net pariba di ex Brisas del Mar.

Na Aruba, den ultimo temponan e situacion aki ta birando mas comun caminda cu hendenan cu tin cas pega cu lama, ta pensa cu e lama tambe ta pertenece na nan y no ta laga ningun hende pasa of landa na e lama.

Manera menciona caba na Aruba tin e ley ‘Landsverordening openbare wateren en stranden’ (Ordenansa nacional awanan publico y nos playanan) cu ta stipula cu tur lama na Aruba ta publico. E ley ta dicta: “den e ordenansa aki y e disposicionnan basa riba dje ta compronde cu awa publico ta awa cu ta accesibel na tur, limita of no, den virtud di normanan di derecho publico.”

E publicacion a ricibi un ola di comentario di parti di comunidad mustrando nan malcontento y frustracion pa e situacion, cu ya caba a cuminsa bira repetitivo na diferente parti di Aruba.

“Pero asina tin mas cas ey banda cu ta haci mescos. Tin full tereno tras di nan cas cera y ta haci doño”;“Ningun beach of lama tin doño. Propiedad di pueblo.”; “Spera cu nan pone nan lanta e mata nan cu nan a corta benta riba e pasada ey, spera nan haya boet tambe bo cas bao cura por ta priva no e baranca ni e lama.”

Esaki ta algun di e comentarionan di usuarionan cu a demostra nan disgusto y alabes a trece pa dilanti cu esaki no ta unico situacion, tin mas cas den e areanan aki cu ta haci nan mes doño di e lama dilanti nan cas.