Otro siman trabou di asfalt ta cuminsa pa proyecto Green Corridor

Gobierno a duna informacion riba e proceso di Green Corridor. Ya por mira cu material di preparacion pa pone asfalt a wordo basha net prome cu e crusada di Mahuma y otro siman trabounan ta cuminsa pa ponemento di asfalt. Esaki ta encera cu camindanan ta bay cuminsa wordo cera entre Pos Chikito y aeropuerto. Tene cuenta cu e caminda principal lo keda habri pero camindanan conecta na e caminda principal lo keda cera pa semper segun director di DOW Marlon Croes.

Cu trabounan di asfalta cu ta cuminsa pa construccion di e di dos caminda, specialmente habitantenan riba e ruta mester custuma cu nan lo no tin acceso pa subi caminda director mas y lo mester haci uzo di camindanan alternativo existente.

Trabounan cla pa cuminsa

Segun Ingeniero Jossy Kock: “Actualmente contratista ta trahando na comienso di aeropuerto preparando ultimo detayenan pa cuminsa pone e asfalt den e proximo dianan cu ta bay bin. Na e crusada di Mahuma, utilidad di Elmar ta haciendo tur e cambionan necesario riba nan kabelnan di tension halto pa asina cu ora e rotonde bin den futuro, e por wordo ubica sin cu ningun kabel ta keda bou di caminda. Den e proximo dianan y simannan, tambe e conexion cu ta bin for di Canashito pa e crusada di Mahuma lo bay wordo cera. Esey ta tocante e ponemento d ‘duiker’ cu lo bin. E ‘duiker’ existente ta bay wordo kibra y lo bin uno nobo. Ya un material pa e asfalta wordo basha riba dje a wordo poni cu ta bay bin net prome cu e crusada aki. Den careda di otro siman lo bay pone e prome asfalt pa e proyecto di green corridor, esey lo cuminsa net despues di e crusada di Mahuma bayendo Sero Teishi.” Segun Sr. Kock,  na altura di Sero Teishi a cuminsa forma e parti di e rotonde, si tur hende por ripara e banda parti panort ya por cuminsa wak e forma di e rotonde cu ta bay bin eynan. Tambe den e proximo simannan lo tin mas movecion di utilidad, unda cu Setar lo haci algun trabou, net pafo di e acera di e rotonde di Sero Teishi.

Cambio di ruta

Si bay direccion mas ariba e trabounan tambe ta bay cuminsa otro siman. Pa dia 15 di februari pa ser exacto, unda cu lo pone un duiker nobo banda di esun existente cu tin banda di veld di Duracel. Esey ta nifica cu e caminda cu ta conecta cu e caminda principal ta bay wordo cera pa tur trafico den conexion cu trabounan.  E habitantenan tambe lo mester bay cuminsa custuma cu e acceso pa e caminda principal no ta bay tin mas eynan. Esey kiermen cu e habitantenan di eytras lo mester uza e caminda di Sabana Grandi pa yega nan destinacion, Sr. Kock a splica.

Caminda principal lo ta habri

Parti di Kibaima tambe tin contratista trahando unda cu trabounan di utilidad ta bay tuma luga e proximo dianan y manera cu eseynan caba, e contratista lo cuminsa cu parti di e fundeshi cu ta cay net pafo di e caminda principal. Durante tur e actividadnan aki e caminda principal no ta wordo influencia di desviacion di trafico, sacando afo e crusada di Mahuma y camindanan di santo pa caminda principal.

Trabounan di brug

Pa loke ta e brug, e trabounan preparatorio ya ta andando y pa esey nan ta preparando e parti abou unda cu ekiponan ta yegando pa cuminsa cu fundeshi. Di eynan simultaneamente ta ocupa cu Pos Chikito unda cu a cuminsa cera tur e accesonan na banda, aworaki trabounan ta sigui unda cu ta cuminsa prepara e parti di embeyecemento y e parti di caminda. Na Jara nan ta haciendo trabounan preparatorio di acera y nan ta haciendo trabounan preparatorio pa cua camindanan mester wordo drecha pa asina den e proximo simannan trabounan di asfalt tuma luga. Eseynan ta e parti di trabounan cu lo tuma luga simultaneamente den full e proyecto. E parti di Jara – Brazil ta e parti caminda cu manera ya menciona, e trabounan preparatorio ta tumando luga segun e planificacion cu tin.

Duracion 3 – 4 luna

“En general, e planificacion ta bayendo manera planifica, cu excepcion di un retraso chikito cual ta solucionando. Ta trata e parti di construccion di e brug mes. E brug ta wordo traha pafo di Aruba y nan lo transporta esaki den pida pida y akinan e lo wordo arma. El a tranca den e parti di heronan cu mester a cumpra, pero esey a wordo soluciona caba y tin tur material y e construccion di e brug ya a cuminsa den exterior.” Manera cu e fundeshi ta cla, e partinan di e brug lo cuminsa yega Aruba pa asina por wordo arma. E di dos caminda principal lo mester keda cla completo pa asina por pasa e trafico pa e parti nobo di e caminda, anto pa por cera e parti existente pa asina tin disturbio minimo di e trafico. Segun Sr. Kock tin un planificacion aworaki y ta calcula cu e duracion di e di dos caminda principal lo tin un duracion di 3 pa 4 luna. “Si wak full e parti principal nobo cu mester bin, tur esey mester wordo prepara, asfalta y asina por haci e cambio.”

Uzo camindanan ‘patras’

“Pa loke  ta e mudamento di waf pa Barcadera, tanten cu full e proyecto no keda cla, e containernan lo mester mobilisa riba e camindanan existente pa asina yega nan destino, esaki ta poco fastioso como tur dos caminda no a core paralelo pero manera cu e ta cla mi ta kere cu nan lo cuminsa uza e parti unda cu ta destina pa nan.” A trata pa e dos proyectonan core paralelo pero no a logra, Segun Sr. Kock. Manera cu nan muda, e mobilisacion di container lo mester keda uza e camindanan existente pa asina mobilisa nan containernan berdad nan por haya stagnacion den e camindanan existente, pero esey mester purba di soluciona mas hopi posibel cu locual cu tin na e infrastructura actual. A mustra Sr. Kock cu e caminda cu a cera ta un ader importante pa esunnan cu ta uza caminda di waf y carga cual ta e caminda di Seroe Teishi pa Barcadera. El a splica cu esaki ta cera como cu ainda no a haci un conexion cu e caminda principal y cu esey ta bay wordo manteni cera. “Lo trata di tene e desvio lo minimo posibel pa e trafico cu ta uzando e caminda principal. Pues e conexion full lo no wordo haci tanten cu e rotonde no ta cla.”

A puntra Sr. Kock si e camindanan lo por wanta e peso di e trucknan si unda cu el a bisa cu e camindanan lo wanta e peso pa motibo cu ya caba tin trafico pisa circulando riba dje cual e ta referi na trucknan di ATCO, y cu te ainda e caminda a wanta. “Esakinan hopi biaha ta mas pisa cu carganan di container mes. berdad ta bay bira mas pero e ta bay pa un periodo corto.” E periodo ta plania pa keda cla na augustus 2017 cual ta nifica cu den apenas un aña y algun luna lo tin full e operacion na su luga, cual lo ta un alivio atrobe pa e caminda ey, el a termina bisando.