Otro siman ta crucial den negociacion di CAO den hospital

Te ainda e negociacion pa logra un contracto colectivo (CAO) pa e trahadonan di Dr. Horacio Oduber Hospital (HOH) ta tumando luga keto bay. Pero entrante otro siman lo bira uno crucial pa finalmente bin cu un CAO na HOH.

E siman aki nan a bolbe sinta mesa diamars ultimo y e negociacion a avansa bastante, segun Mediador di Gobierno, Anselmo Pontilius. Tur cos ta indica cu ambos partido a yega na un parti unda di berdad nan mester por supera e puntonan cu ta ariba mesa. “Nan ta hopi cerca!,” el a declara na Bon Dia Aruba.

Algun di e puntonan di discusion tin di haci cu asunto di pensioen y tambe adaptacion di structura di salario. Pero tambe e cambionan di orario di trabou. Hospital ta un di e dunadonan di trabou mas grandi na Aruba. Nan tin un cantidad di mas cu mil trahado. Pero di e mil trahado aki por ta entre 200 pa 300 trahado ta traha diferente tipo di warda.

P’esey e cambionan di orario of warda di trabou ta bira un punto hopi importante pa e trahadonan den e negociacion aki. Particularmente pa esunnan cu ta traha warda laat anochi. Ta un aspecto den cual sindicato ABV a dedica hopi tempo na dje y te hasta tabata punto di discusion den e ultimo reunion di e siman aki. Esaki debi na e cambionan cu a wordo haci.

Ta asina cu e trahadonan cu tin mas cu 55 aña, no mester core warda laat anochi. Pero awor nan kier haci te 60 aña pa ahusta na e cantidad di orario, y e trahadonan kier sa kico ta nan derechonan cu nan a keda cune. Pero tambe kico ta e compensacion extra cu e trahado ta haya pa traha warda laat anochi. Tur e puntonan aki a wordo debati pa medio di un combersacion profundo. Tur dos partido a duna di conoce cu nan interes ta, si nan por caba otro siman cu e negociacion aki.

Ta asina cu den e reunion a dicidi cu diamars awor 29 di october tin indicacion cu mester por palabra un fecha concreto pa e CAO. Pontilius a agrega cu logicamente esaki mester conta cu aprobacion di gerencia di hospital y di e miembronan di e sindicato ABV, cu finalmente por yega na un contracto colectivo di 3 aña.

E dia cu Mediador di Gobierno a duna e entrevista na e matutino aki, ainda e sindicato di e trahadonan di hospital no a haya e texto final cu nan por bay den reunion general cu nan miembronan. Sinembargo esaki no ta kita cu tin un speransa cu esaki por ta e caso, ya cu tin varios luna largo caba di negociacion.