Despues cu sindicato di polis SPA a vocifera nan preocupacion pa e futuro di Dolfi Richardson cu kier kita como alto comisario di cuerpo policial, minister di Husticia Andin Bikker a bisa cu otro siman lo tuma un decision.
SPA a señala cu e korpschef for di un tempo pasa a expresa cu e tin pensa di bay den un otro reto. Esaki Bon Dia Aruba tambe a publica den un entrevista extenso cu sr. Richardson luna pasa. E sindicato a expresa di kier haya un claridad riba e parti aki pa su miembronan, asina e minister ta informa den un relato. E mandatario ta bisa di tin ‘tur atencion riba e tema aki y den transcurso di otro siman lo bay tuma un decision pa loke ta trata e mando di cuerpo policial y trece claridad pa tur partido tanto korpschef como tambe sindicato SPA’.
Minister di Husticia a expresa tambe cu loke ‘a trece incertidumbre ta cu korpschef su deseo ta pa institui un instancia pa loke trata Interpol y combatimento di terorismo y cu e minister saliente minister Dowers no a regla e instancia aki at all’. “Ta den un conseho di minister di gobierno anterior a tuma un decision, durante periodo di gobierno demisionario 5 di september, riba e tema aki y por a mira no a consulta cu ningun instancia unda e korpschef su deseo ta pa bay resorta bou di e instancianan aki. Tur esaki ta den un proceso hopi prematuro pa loke ta e manera con a haya e situacion aki.”
Henter e situacion aki tin tur atencion di minister di Husticia, sr. Bikker ta bisa, y a comunica esaki tambe na directiva di SPA y e miembronan presente. “Den transcurso di otro siman ta bay tuma un decision riba e tema aki pa trece bek e trankilidad den e cuerpo y e miembronan. Tambe lo bay cuminsa cana e proceso pa ekipa cuerpo policial debidamente manera ta poni den acuerdo di gobernacion.”
