Otro siman gobierno lo reuni cu sindicatonan: Minister Presidente a pidi sindicatonan pa no blackout

Minister Presidente, Evelyn-Wever a ricibi e dos manifiesto entrega pa SEPPA y un mas entrega pa SIMAR na final di e marcha di protesta cu a tuma luga diaranson atardi. E prome mandatario tabata compaña pa dos miembro di su gabinete, minister Dangui Oduber y minister Andin Bikker.

Premier Wever-Croes a bisa cu e ta dispuesto pa sostene un reunion hopi lihe cu e sindicatonan entrante otro siman. Un solicitud cu a bira hopi evidente tabata esun cu minister presidente a haci na e dirigentenan sindical tanto di SEPPA, SIMAR y SPA pa ‘por fabor no ban blackout.’

El a argumenta su solicitud bisando cu ‘nos mester di nos hendenan.’ El a laga sa cu actualmente nos ta den un crisis, y gobierno mester paga bijstand. Pero si nan ta bay blackout y no tin ambtenaar, no lo tin hende pa paga bijstand y tambe FASE, y otro tipo di ayudo. Nan mester di mas personal pa duna un man cu e trabao grandi aki. Tambe pa habri scol bek, nan mester di e personal riba veld di enseñansa. “Mi ta haci e apelacion ey, ya cu esaki ta momento pa solidarismo…,” el a bisa.

Segun e prome mandatario pa loke trata e tema di enseñansa, nan mester reuni separa. Pero tambe e reunion pa atende malcontento di e maestronan, gobierno ta bay haci’e den transcurso di otro siman.

Pa loke ta e tema di cortamento di salario di e trahadonan di sector publico, Prome Minister a expresa cu e decision aki a ‘duel mi enormemente hopi’. El a reitera cu actualmente debi na e crisis, nan ta bahando un 5% di e salario di e trahadonan publico. “Mas nos tarda, mas halto e porcentahe ta bira,” el a bisa.

Igualmente el a expresa cu nan no sa ki dia e crisis aki ocasiona pa a pandemia di coronavirus ta bay caba. “Pa awor e ta mustra cu si nos corta salario so, nos por sali afo,” asina el a bisa na e dirigentenan sindical di SEPPA, SIMAR y SPA.

Igualmente el a formula un invitacion pa e dirigentenan di SEPPA y SIMAR bin atende un reunion otro siman cu gobierno pa mira kico lo por wordo haci cu nan puntonan expresa den nan manifiestonan. Igualmente el a bisa cu den e reunion nan ta bay delinea hunto e caminda cu tin nos dilanti.

Manera comunidad sa, premier Wever-Croes ta di luto. Sinembargo el a bay atende e solicitud di e sindicatonan en cuestion pa entrega nan manifiesto di un forma respetuoso.

Na final e mandatario a gradici e dirigentenan sindical pa nan atencion. E ta convenci cu hunto nan lo por atende e puntonan di preocupacion cu nan tin.