E autopsia cu a tuma luga dialuna a riba e curpa di Shasha Fong tira mata diamars pasa, a resulta cu el a fayece a base di herida di un bala. Esaki Ministerio Publico ta informa. E curpa awor a regresa na su famia.
Hopi informacion relaciona cu e investigacion di e caso di tiramento na Wayaca lo keda secreto den interes di e investigacion, husticia ta bisa. Pues no kier duna un descripcion mas detaya di e sospechoso. Riba e video cu polis a saca tampoco por mira mucho.
Bon Dia Aruba a puntra Ministerio Publico entre otro si por a determina e caliber di arma di candela cu a wordo uza den e crimen pero nan no kier duna detaye. Nan ta haya esaki ta informacion cu solamente e dader y e victima por sa. No tin ningun confirmacion of indicacion via polis of Ministerio Publico cu e sospechoso por a conoce e famia mirando cu supuestamente el a yega e cas na pia. Riba e video por mira tambe cu e sospechoso a bay e cas specificamente.
Tin un otro persona envolvi
Minister di Husticia Arthur Dowers a bisa ayera mainta cu: ”Den nos punto di bista e sospechoso ta conoci por lo menos di un persona mas pasobra nos ta compronde e sospechoso a wordo yuda un dado momento den auto door di un otro persona cu a yud’e scapa.” Te ainda no a haya e tip di oro ainda.
