Narco-violencia a bolbe costa bida di un periodista na Mexico. Javier Valdez, periodista di e revista Ríodoce, un di e reporteronan cu mas y miho a conta di e violencia di narcotrafico na Sinaloa, a ser tira mata ayera den pleno luz di dia na Culiacán, capital di estado, despues cu algun homber a intercepta su vehiculo, segun a prome versionnan recogi pa e semanario unda e tabata traha. Valdez ta di seis periodista asesina e aña aki caba, mas cu mita di aña pasa, cu a bati tur record cu 11 ehecucion. Desde aña 2000, a muri mas di 100.
E golpi pa periodismo, pa sociedad Mexicano, ta teribel, mas ainda en bista di e clamoroso impunidad y e silencio di e institucionnan. No tabatin ningun detenido pa e seis asesinatonan di periodista di e aña aki. E reaccion riba e cinco mortonan prome cu esun aki tabata e designacion di un fiscal di delito contra libertad di expresion, un medida por lo menos ridiculo, si tuma na cuenta e magnitud di e tragedia.
Javier Valdez tabata un eminencia, e gran cronista di narcotrafico na Sinaloa, un di e periodistanan mas respeta na Mexico, ora ta papia di crimen organisa, entre otro pa su buki ‘Narco Periodismo. La prensa en medio del crimen y la denuncia’ cu ta aborda e tema di e trabao di e reporteronan cu no ta keda keto meymey di e narco violencia. Despues di cu Miroslava Breach, coresponsal di La Jornada na Chihuahua, a ricibi, na fin di maart, ocho tiro saliendo di su cas, Valdez a skirbi riba Twitter: “Miroslava nan a mata pa lenga largo. Laga nan mata nos tur, si esey ta e condena di morto pa reporta e fierno aki. No contra silencio.”
Puntra pa su opinion recientemente pa un periodista tocante e aresto di Damaso Lopez, un di e sucesornan di El Chapo, Valdez a opta pa no bisa nada: “Disculpa, agradezco tu interés, pero por razones de seguridad no puedo dar declaraciones, se puso cabrona la situación”, el a skirbi den un mensahe. E tabatin rason.
