mas (1).JPG
Un parti di e presentacion di partido MAS di Holmo Henriquez ayera a bay over di e colornan di e partido blauw scur, cora y blanco. E colornan tambe ta uza pa POR, e partido di Otmar Oduber cu diadomingo a keda lansa.
Sr. Henriquez ta splica prensa den palabranan hopi cla cu su partido MAS (Movimiento Arubano Sobernano) ya ta funda aña pasa riba 17 di september. “Awe ta solamente e formalidad di e registro ta wordo haci publicamente cu e presencia di sr. Hubert Maduro di Electorale Raad.”
E registracion pa e Conseho Electoral aki, tambe ta encera escogencia di colornan di partido. Cual a bay den consulto cu sr. Maduro, asina e presidente di e partido sr. Henriquez ta enfatisa.
For di januari nan a profila nan mes cu e colornan caba y tambe a print sticker cu algun autonan ta coriendo cu nan caba, segun e. Asina e kier kita duda riba ken tabata e prome.
Awor cu diadomingo sr. Oduber a lansa su partido cu e mesun colornan, e reaccion di sr. Henriquez ta lo siguiente: “Un tiger no ta perde su strepinan.” Cu esaki e kier mustra cu ‘Otmar su modus operandus no ta diferencia di e partido den gobierno, paso nan tambe ta trapa riba derecho di otro.” “E gobierno aki no ta diferente paso nan ta duna permiso na companianan sin cu pasa e proceduranan legal prome.” Sr. Henriquez ta bisa cu su partido lo pone un final na tur esaki y ta bisa cu asina e ta mustra cu Forsa Nobo ‘no ta nada nobo di locual ta existi den gobierno y parlamento caba’.
‘Pueblo no mester depende riba minister’
E presidente tambe ta critica e union entre PDR y POR cu segun e ta ‘falta di caracter, principio y moral di e lidernan di e partidonan’. “Asina tin hende ta bende nan alma cu diablo basta nan yega na poder.”
Sr. Henriquez ta comenta cu e mes no ta bay den politica pa ‘haya poder of enrikece mi mes’. Punto principal di e partido MAS ta cu kier caba e dependencia di e pueblo riba cualkier minister of politico pa asina haya trabou of proyecto. “No tin oportunidad igual na e pais aki. Tur e tipo di politicanan aki a contribui na haci nos pueblo dependiente di e gobierno cu sinta. P’esey nos pueblo mester ta consciente cu ta e pueblo tin e soberania riba cualkier gobierno cu sinta.”
E ta bisa cu e partido e ora lo percura pa e pueblo recupera e poder soberano bek den su man. Con MAS lo bay asina te awor no ta mucho cla.
Sr Oduber di partido POR a comenta cortico na nos partner NoticiaCla riba e asunto di colornan di partido y cu MAS a pidi pa nan scoge otro colornan. ” Logo y color no ta prioridad di Aruba. Nos ta laga otronan bringa y papia di logo”, sr. Oduber ta bisa. Segun e, ta prome minister cu  mester dicidi riba colornan di partidonan politico.