Pa fin di luna venidero renobacionnan lo cuminsa na Baby Beach, na mes momento cu lo kibra tera na unda lo construi e hotel Secrets Aruba, na Sero Colorado. Pa atrae mas turista na San Nicolas gobierno kier mas trahado cu por fungi como tour guide pariba di brug.
Durante un conferencia di prensa cu a tuma luga riba dialuna, Minister Dangui Oduber (MEP) a papia tocante e proyecto di Baby Beach y cu ta bay inverti bou di fondo di ATA pa haci e proyecto posibel.
Un di e cambio cu lo bay bin pa Baby Beach ta cu lo amplia esaki, unda ta bay crea un espacio di parkeo. Tambe ta bay mehora infrastructura, lo bay tin kiosko y restaurant. Lo tin facilidad di baño y proceso di destaho lo cuminsa.
Segun e mandatario a splica cu tur cos lo cana segun e planning, unda cu fin di luna benidero lo tin e ‘ground breaking’ na e mesun momento cu e proyecto di hotel pariba ta canando.
Un Oficina di Turismo lo ta operando entrante 19 di augustus, esaki ta habri ya caba desde luna di mei. ‘Nos a haci e proceso cu mester a encamina y mester a busca un compañia cu ta sera contrato cu ATA. Na mesun momento mester busca empleado cu lo bay traha den oficina aki. Unda cu lo ofrece tour na San Nicolas’, Oduber a expresa.
Pa finalisa e mandatario a bisa cu San Nicolas ta hayando e atencion cu merece, despues cu a haci e promesa cu lo inverti den area pa asina crea un movecion turistico, pa tin un cambio pa turista pabou di brug yega pariba di brug. “E proyecto di baby beach ta importante, tambe lo inverti den Rodger’s Beach, e pier y lo duna atencion realmente na San Nicolas conforme nos promesa di campaña.
