Cuminsamento di proximo luna, gobierno lo test su app di notificacion di coronavirus entre algun centenar di usuario den region Twente, segun minister di Salubridad Publico, Hugo de Jonge a skirbi den un carta pa parlamento.
Meta di e test ta pa mira si e app ta comprensibel y facil pa usa, y ki mehoracion mester haci.
Lo haci e test den colaboracion cu GGD Twente y varios otro organisacion den e region. Participantenan lo ricibi informacion con e test lo traha y unda pa download y instala e app. Durante e test, investigadonan lo mira ki problema lo resulta y con hende ta responde si nan haya un test positivo (simula) pa COVID-19 of un notificacion cu nan tabata den contacto cu un persona positivo. GGD Twente tambe lo mira con e app ta fit den su tracing existente pa fuente y contacto.
Esaki ta e prome den un serie di test pa e app. Unabes e test caba, participantenan lo desinstala e app y e desaroyadonan lo traha pa mehora esaki basa riba e hallazgonan.
Ministerio di Salubridad Publico lo traha cu hackernan pa test seguridad di e app, segun experto di siguridad cibernetico, Brenno de Winter a bisa RTL Nieuws. Lo recluta e hackernan for di e trahadonan di tecnologia di gobierno y e compania NFIR. Tambe lo pone recompensa disponibel pa hackernan cu haya leak di data of problema di seguridad y reporta esakinan.
A desaroya e app di coronavirus cu ayudo di Autoridad di Impuesto pa motibo di nan infrastructura tecnico, y nan historia di lansa app na publico na gran escala, segun Ron Roozendaal, cabesante di IT na e ministerio.
E app ta usa tecnologia di Bluetooth pa intercambia numbernan unico y non-traceable entre celularnan cu ta cerca di otro. Si un persona test positivo pa COVID-19 y reporta esaki na e app, e app ta notifica tur celular cu tabata cerca di e persona en cuestion. Esaki ta funciona unicamente si ambos partido tin e app den nan celular.
De Jonge a bisa anteriormente cu pa e app traha mas efectivamente, alrededor di 60 porciento di poblacion Hulandes lo mester usa esaki activamente. Pero un encuesta recien a mustra cu apenas un cuarta parti di e poblacion ta dispuesto pa hacie.
