Ministerio publico di Venezuela a informa di fayecimento di un hoben di 22 aña, cu a haya un tiro durante un manifestacion di oposicion na autopista Francisco Fajardo, principal caretera di Caracas.
“Fiscal 126 di Area Metropolitano di Caracas lo investiga e fayecimento di Luis Vallenilla (22), cu a haya un tiro durante e manifestacion na sector di Altamira” fiscalia a publica riba twitter. Cu e fayecimento aki , fiscalia tin 75 Venezolano cu a fayece segun dato cu ta actualisa pa fiscalia di Venezuela , desde dia 1 di april cu a cuminsa e ola di protesta.
Alcalde di municipio di Chacao, Ramón Muchacho, a bisa cu e victima tabata na autopista, unda varios persona tabata manifesta, mayoria di nan cu nan cara tapa. Nan tabata enfrenta cu polis,militar y un di oficial di siguridad a tira un tiro den base militar di La Carlota.
Lider opositor Venezolano Henrique Capriles a denuncia tambe cu e hoben a wordo asesina na “Quema ropa”, kiermen cu un tiro hopi cerca pa funcionario “esbirros” di Nicolas Maduro.
Durante protesta varios persona a wordo herida, aunke no tin informacion ainda si nan a wordo lesiona pa arma di rubber of arma di candela.
