Diamars un adolescente di 14 aña a muri na Venezuela di un tiro durante un protesta contra gobierno di Nicolas Maduro, Alfonso Marquina, diputado opositor a bisa.
“Nan a confirma cu un mucha di 14 aña, identifica como Brayan Principal, a haya un tiro na su bariga durante un manifestacion na ciudad di Barquisimeto,” Marquina a skirbi riba Twitter.
E parlamentario a responsabilisa pa e situacion aki un grupo cu ta apoya e sector politico di chavismo, y cu grupo di oposicion ta yama un banda arma”. “Henter mi solidaridad pa famia di e hoben cu a muri y mi compromiso di lucha pa logra cu e crimen no keda impune” Marquina a bisa.
Dos hoben di 19 aña a muri di tiro riba dia 6 y 11 di april na Caracas y Valencia, den mobilisacion cu grupo di oposicion a organisa den e luna aki, contra gobierno di presidente Nicolas Maduro. E fayecimento a ser confirma pa fiscalia, aunke gobierno ta pensa cu e persona cu a fayece na capital no tabata participa den protesta. Den tur dos caso, e fayecimento a sucede supuestamente pa tiro di polis, ora cu nan tabata purba disolve protesta y blokeo riba caminda.
Protestanan a cuminsa cu lucha entre manifestante y forsa di polis y militar, situacion den cual a keda decenas di hende herida y mas di cien persona deteni.
