Diadomingo varios hende a bati alarma riba medionan social cu tin un otro derame di azeta cu a sosode na Trinidad, cual aparentemente lo ta mas grandi cu esun anterior. Rampenbureau Aruba ta informa Bon Dia cu nan no a haya ningun confirmacion oficial riba esaki for di Rempeitic Carib, cual ta e instancia oficial pa verifica y trata cu e situacion aki.
Rino Hermans di Rampenbureau ta splica Bon Dia cu Rempeitic tin cu notifica tur isla den Caribe oficialmente ora cu tin un derame di azeta. Esaki no a tuma luga ainda relaciona cu un otro derame cu aparentemente lo mester a tuma luga diadomingo ultimo na Trinidad atrobe. “Nos ta wardando riba e confirmacion oficial. Nos tambe por bay sigui social media y cay den wega pa resulta cu tabata un joke un hende a haci of algo asina. Mi tambe a wak e noticia circula. Trinidad tin cu bisa cu el a bay for di control eynan mes, y notifica Caribe.” Rampenbureau a manda puntra cu si tabata tin un derame, cuanto bari e ora nos ta papiando di dje. “Biaha pasa 300 bari a dura nos mas o menos seis siman di trabao intensivo tur dia. Despues nos a move pa tres biaha pa siman. Kiermeen depende cuanto bari e ta tambe, mi lo sa cu nos lo bay tin cu traha un tres pa cuater luna.” Berdad tin un derame na Trinidad & Tobago atrobe segun Rampenbureau a laga sa den un comunicado dialuna atardi. Pero ainda no por confirma si ta papia di un categoria TEAR III of Trinidad & Tobago a contene na un TEAR II, esta localmente. Asina cu tin informacion oficial Bureau Rampenbestrijding Aruba lo notifica prensa y publico general anto activa e team. “Alabes lo cuminsa haci preparacion necesario pa responde si e derame bira un menasa pa Aruba.”
Prome derame no a keda raporta na tempo
Ainda nan no a keda cla cu e prome derame di azeta tampoco segun sr. Hermans. Ainda Hulanda mester manda su resultadonan pa Aruba cuminsa cu e parti di claim. Cu e prome derame algun luna pasa cu a afecta nos costanan basta hopi, a gara nan for di base pasobra Trinidad no a raporta na e instancia oficial pa nan notifica e islanan. E biaha aki e comunicacion ta drentando prome cu tempo.
Una bes cu e informacion oficial drenta, Rampenbureau tin e deber pa manda notificacion y mantene publico informa. Lo haya informacion riba e actie plan tambe cu Rampenbureau ta traha. “Y nos ta preparando pe caba,” sr. Hermans a expresa na Bon Dia, señalando na un mapa di Aruba completo cu nan tin buta riba un muraya den un parti di nan oficina. Manera cu nos a yega di informa relaciona cu plan di maneho pa derame di azeta na Aruba, Rampenbureau a bolbe enfatisa: “Nos tin un plan nacional pa maneho di derame di azeta cu djis falta update e. Cada cinco aña bo tin cu update e. ”
‘Tarballs’ den nos costanan atrobe
Tur hende ta pendiente cu Rampenbureau pa wak kico ta e situacion. Nos a tuma contacto cu Parke Nacional Arikok cu tambe tabata basta activo durante e prome derame algun luna atras. Si e azeta aki ta bay yega nos costanan mes, e lo ta te aki tres siman segun calculacion di sr. Hermans. Prome cu esey e ta bay bira tarballs atrobe paso e ta bay verdamp. Riba 12 di juni nos a publica cu e situacion di e prome derame di azeta na nos costanan ainda tabata un calamidad. Dos dia despues Rampenbureau ta baha esaki di intensivo pa pasivo. Nan a informa nos algun dia despues di esey cu nan lo sigui cu un limpiesa di monitor te cu 20 di juli pero ta continua cu un langdurige monitor di nos costanan pasobra: Experiencia ta bisa cu 6/7 siman no ta suficiente, bo tin cu keda monitor pasobra bo no sa cuanto tin den e awa.
Si yega asina leu cu por ehempel tres luna ta pasa y no ta haya tarballs, e ora ta yega fin na e operacion akinan. Hopi area a keda basta sushi, cu azeta bao santo y riba piedranan. Pero manera cu nos a informa tambe, segun Rampenbureau no mester mishi cu esaki a base di recomendacion y escogencia di expertonan di exterior (Oil Spill Response Limited di Fort Lauderdale). Esaki sr. Hermans a splica nos algun luna pasa cu crudo ta un producto natural y naturalesa mes lo ahusta su proceso di medio ambiente.
