Otro conferencia riba sostenibilidad

Den e dianan aki tin atrobe un of otro tremendo evento tumando luga den e categoria ‘green, sostenibel’, o algo por el estilo. Atrobe ta trece un audiencia di exterior, entre otro di e otro teritorionan di ultramar den nos region y otro personahe di Union Europeo, pa bin scucha kico ta e cosnan maraviyoso cu Aruba lo bay haci, talbes, den futuro… Manera semper, en todo caso e medio local aki no ta haya un invitacion pa cubri e evento y nos ta OK cu esey. Lo tabata otro si den e casi ocho añanan cu a transcuri bao di e gobierno aki, lo tabatin algo positivo di menciona. 

Pero manera ta bisa na Ingles:”only lip service.” Y di nos banda esey no ta palabra, nos tin e echonan pa sustenta esaki. Di esey djis aki mas. Di otro banda, no mester comprende nos malo tampoco; nos conoce y ta para tras di e 17 metanan pa desaroyo sostenibel cu Nacion Uni a formula pa aña 2030. Nan ta un guia importante pa cualkier pais, y sigur paisnan chikito y vulnerabel manera nos isla Aruba, pa tene bon cuenta cu nan y uza nan como guia pa logra hiba nos pais mas y mas den direccion di un economia y prosperidad cu nos por keda carga y mantene. Por cierto recientemente e editorial aki a dedica atencion na algun di e metanan aki, considera prioritario pa nos.

Loke ta importante pa mantene na bista ta cu e metanan no ta un guia solamente pa un gobierno cu e grupito di confiansa cu nan a reuni alrededor di e gabinete, cu ta haci nada otro cu confirma y mantene entre nan e creencia cu nan ta riba e bon caminda. Si di berdad bo kier uza e metanan menciona como guia pa desaroyo sostenibel, anto bo lo mester comunica cu henter comunidad, na tur nivel y den un cantidad grandi di asunto. Nos ta bolbe trece dilanti e proyecto di gobierno anterior (Nos Aruba 2025) unda a reuni masha hopi hende di diferente sector, gremio, NGO, etc. pa delibera y formula plan basa riba e mesun concepto cu ta maneha awor pa loke ta e 17 metanan di Nacionnan Uni. Pa e ciniconan entre nos no tabata nada straño cu e gobierno cu a drenta na 2009 no tabata desea di haci nada cu tur e informacion, entusiasmo y experiencia comparti den e proyecto aki, djis pasobra el a cuminsa bao di un otro gobierno y por lo tanto nunca por ta bon, es decir, for di nan punto di bista.

Loke ta lubida ta, cu si bo kier organisa un otro buelta di consulta awor, bo ta haya e mesun participantenan, tanto na nivel di organisacion como na nivel di persona, pasobra tanto no a cambia den e circulonan aki. Loke e participantenan ta bay haya ta un ripiticion di loke a haci na 2008/2009, probablemente cu e diferencia cu e gobierno aki, den nan afan pa controla tur cos, lo ta mas selectivo cu e personanan cu nan lo invita pa participa na e consulta, si acaso uno tuma luga. Organisa esaki di e manera aki lo ta un eror grandi, pa e simpel motibo cu bo no ta haya e resultadonan cu lo bo desea, ya cu e idea tras di e proyecto aki ta logra mobilisa poblacion na diferente nivel y maximalisa e grado di consenshi necesario pa logra un cambio duradero. E deseo di mantene un proyecto nacional asina bao di control estricto di e partido den gobierno ta un eror hopi grandi, cu lo bay resulta den dificultad pa yega na e metanan desea.

Y esaki tumando na cuenta cu ya caba por papia di resultado bastante pober den e añanan nos tras. Esey tin hopi di haci cu e hecho cu tin diferencia grandi entre haci propaganda, den esey e gobierno aki ta campeon, y realmente tuma e pasonan necesario pa yega na realisa e metanan nos dilanti. Loke nos por mira ta cu den e periodo di gobernacion aki, desde 2009, a enfoca hopi riba e aspecto di energia renobabel. Riba su mes esey no mester ta un mal escogencia, pero e ora ta necesario si pa realmente logra algo sustancial, pa por move bay pa e siguiente meta. Pero kico nos por a mira? Cu cada aña tabatin menos di conta den e conferencianan ‘green’ teni. Y pakico?  Pasobra segun nos opinion gobierno a scoge un acercamento demasiado limita, sin tuma na cuenta otro alternativa pa yega na un mescla bastante varia di fuente di energia alternativo, cu mayor oportunidad pa complementa otro. Por ehemplo, a pesar di presentacion bastante avansa di plannan pa ‘deep sea water cooling’, finalmente gobierno no a haci nada cu esaki.

Loke si a haci ta keda pega den energia di biento, cu varios caso pa bay ainda den corte, y proyectonan limita di energia solar, sin habri caminda di berdad pa energia solar produci pa e ciudadano mes. Por lo demas, nada no a cambia. Anuncia cu “nos lo bay haci” no ta mescos cu logra algo.