Ayera merdia a bira conoci e noticia lamentabel cu otro persona a hoga na Baby Beach. Ta trata di un turista masculino di 63 aña di edad.
Segun informacion personanan cu tabata presenta a tuma nota di loke a pasa y saca e homber for di lama y a cumnisa cu intento di reanimacion. Mientras tanto a comunica cu e instancianan concerni y Polis y Ambulance a presenta na e sitio di biaha pa sigui cu e esfuersonan di reanimacion.
Lamentablemente no por a haci mucho mas pa e persona y a pidi dokter pa presenta y contata morto di e turista masculino di 63 aña di edad di nacionalidad Mericano. E caso lamentabel aki ta suma na diferente otro caso di hogamento na e mesun lama aki.
Baby Beach ta un lamanan mas popular tanto pa turista como pa local, conoci specialmente pa tiki profundidad y lama calmo cu ta haciele ideal pa muchanan disfruta. Pero e tin tambe su parti peligroso cu hopi no ta na altura di dje y ta pa e motibo aki tanto caso di hogamento ta sucede.
A pesar cu ta haci propaganda pa turistanan bishita Baby Beach, mester remarca cu no tin mucho esfuerso ta ser realisa pa loke ta trata e parti di seguridad.
Un aspecto cu varios ciudadano a yega di trece dilanti ta cu tin un necesidad pone lifeguards na e lama aki. Esaki lo yuda disminui e chens di hogamento y e lifeguardsnan lo por reacciona mas lihe tambe den caso cu un persona encontra dificultad den lama evitando cu lo termina den un suceso lamentabel.
Otro aspecto cu ciudadanonan, como tambe turistanan a yega di trece dilanti ta e hecho cu mester pone tambe borchinan cu notificacion indicando claramente na turistanan pa tene cuidou cu cierto areanan di lama y pa no landra den e areanan aki pa motibo di e coeriente di lama, cual ta haci’e mas peligroso.
Den aña 2024 tabatin un cantidad di caso di hogamento, no solamente na Baby Beach, pero na otro beachnan rond Aruba tambe, cu ta involucra turistanan, den mayoria di caso di edad halto. Otro factor cu ta importante pa tene presenta ta e hecho cu Aruba ta calor, solo ta cyanete y talbes den lama hunto cu e aire no ta sinti asina calor, pero asina mes e cayente di e solo por tin efecto riba e curpa y por causa cu e persona ta bira malo y hoga.
Comunidad ta haci yamado na e instancianan concerni y gobernantenan pa pone esaki tambe como un punto di atencion y haci algo pa loke ta trata seguridad di tanto turistanan como ciudadanonan local na nos beachnan.
