Otro cacho ta sufri na man di hende

Diadomingo atardi, Luna Foundation Aruba a publica un potret reportando otro caso lamentable cu ta involucra maltrato di un cacho. Ta trata di un cacho di caya, cu aparentemente no tin doño, cu a ser haya cu ducttape rond di su boca.

Segun e publicacion di e fundacion ariba nan pagina di Facebook, un persona lo a wak e cacho ta cana rond cu su boca cera cu ducttape y di biaha a tuma contacto cu tanto e fundacion como polis.

“Con bo por haci algo asina? Ora cu nos pensa cu nos a wak tur cos, algo asina ta wordo reporta. Nos no sa ken a haci esaki, pero polis local a libera e cacho di caya for di e ducttape,” e publicacion a indica.

Aruba ta wordo azota pa loke ta parce un ola di casonan di maltrato di cacho. Algun di e casonan aki, manera ta conoci caba, a termina den morto di e bestianan, cual tabata e caso di e cacho cu a haya e nomber di Khaleesi, pa cual su doño a wordo sentencia den corte na servicio comunitario, y tambe e caso di e cacho yama Snowy, cu te ainda no a tende si ta bay presenta cargo contra e doño.

E publicacion aki a ricibi hopi reaccion y atencion di tanto ciudadanonan local, como tambe di turistanan cu a expresa nan frustracion, tristesa y rabia pa e situacion cu tin aworaki na e isla cu e casonan di maltrato di bestia.

“Mi siguiente biahe pa Aruba, e siman aki, lo por ta e ultimo. Mucho scuridad na e One Happy Island” un usuario a comenta, miesntras otro a skirbi: “Si e isla no haci nada tocante esaki nan ta bay perde turista.”

Un usario a comenta cu e lo desea di bishita Aruba y gasta su placa, pero mientras cu no tin un luz na fnal di e tunnel pa e situacion aki, e lo sigui bishita Bermuda. “Durante mi ultimo biahe pa Bermuda mi a wak dos cacho y un pushi bon manteni. Un doño di cacho a bis ami cu e ta costa ocho mil dollar pa por tin un cacho na Bermuda. E ta un privilegio, no un derecho pa ta doño di un bestia na Bermuda,” el a agrega.

Un ciudadano local tambe a expresa su tristesa den e comentarionan. “Esaki ta kibra mi curason. Ningun alma inocente merece esaki. Cansa di tur e abusadornan canando liber rond, gobierno di Aruba, ki dia bo ta bay lanta y tuma accion? Claramente placa no ta e problema,” el a bisa.

E ta evidente cu tanto turista y pueblo ta cansa di e situacion y ta haci un yamado na gobierno pa tuma accionnan concreto pa asina termina cu tur e abuso di bestia cu ta tuma luga na e isla.