Casonan di maltrato di cacho ta yamando atencion cada dia mas den comunidad. A traves di su pagina di Facebook, minister Ursell Arends a publica tocante otro caso di maltrato di cacho unda lamentablemente, e cacho tampoco no a logra sobrevivi.

“Un otro caso tristo di negligencia y maltrato di mascota. Ayera nochi, a tuma contacto cu minister Arends a pa un caso hopi tristo den a bario di Kurimiauw. Presente na e sitio a bin encontra un mascota cu lamentablemente no a wordo ofreci e empatia y amor cu e merece. Bisiñanan a hiba e cacho veterinario mesora pero nos a cab’i ricibi e mal noticia cu e no a logra sobrevivi. Nos tin cu para hunto como comunidad contra abuso di animal!” e publicacion a indica.

E publicacion a ricibi diferente comentario y reaccion di usuarionan cu ta puntra te ki dia mester warda, cuanto caso di maltrato mas mester sucede pa por bin un cambio real den e ley pa duna castigo na e abusadornan.

“Kico a sucede cu esnan responsabel pa su morto? Casonan ta sigui drenta. Maltrato ta sigui tuma lugar. Ta urgi pa por fabor haci algo cu e ley. Husticia corecto ta pa esnan responsabel ricibi un bon boet of bay cera. Por fabor minister concerni ya no mas… mas nos sinta warda pa cambia e ley mas abuso lo tuma lugar,” un usuario a comenta.

“Cuminsa actua! Para e abuso. Cuanto abuso mas mester pasa?” ; “Please tuma accion contra di esnan cu ta comete e maltrato! Nos no por acepta mas biba asina cu falta di compasion” ; “Please cuminsa actua Minister Ursell Arends contra e monsternan aki please! Hendenan si boso wak algo, bisa algo, haci algo! Please reporta e abusonan, esaki ta birando pio dia pa dia,” ta algun di e otro comentarionan cu e publicacion a ricibi.

Pueblo ainda ta recuperando di e caso impactante di maltrato di e cacho cu a ricibi e nomber Khaleesi. Un caso cu a shock comunidad completo mirando e severidad di e maltrato cu a ilustra e maldad di e doño, cu claramente no tabatin ni amor ni compasion pa e cacho. Bon Dia Aruba a tuma contacto cu Ministerio Publico pa puntra ki accion ta tumando den e caso aki. Vocero di OM a bisa cu “e proces verbaal di polis a drenta Ministerio Publico” y a indica cu por spera un decision “posiblemente dentro di dos siman di tempo.” Mientras tanto, tin un marcha silencio plania pa diasabra awo, organisa pa entre otro Luna Foundation, pa exigi husticia pa casonan di maltrato di bestia na Aruba.

Lamentablemente, casonan asina tin hopi, pero esaki no ta hacie aceptabel. Ley ta existi y cu colaboracion di KPA, mester sigui reenforsa esaki pa asina comunidad di Aruba por cuminsa realisa cu abuso di animal no ta bay sin castigo.

Abandono y maltrato ta bay contra ley di cacho. Ta importante pa comunidad en general cuminsa actua den esaki, pa ta doñonan mas responsabel y cuida mascotanan cu tambe ta sinti y ta sufri.

E pregunta cu ta bin pa dilanti ta cuanto biaha mas mester sigui haya casonan di abuso di bestia di e magnitud aki? Problemanan di cacho y pushi riba caya ta sigui keda un problema sin precedente y comunidad henter mester bira mas consciente di esaki.