Apesar cu actividad ta tumando luga pa contraresta e efecto desbastado di Lionfish cerca nos poblacion di pisca nativo, e pisca invasivo aki su presencia ta sigui crece cerca nos rifnan.
E biologo marino na servicio di Centro di Pesca Hadicurari, Sr. Byron Boekhoudt a declara na Bon Dia Aruba cu for di 2011, ora cu e prome torneo nacional a wordo organisa, e cifra di Lionfish a keda aumenta. E experto aki a señala cu ta existi un indicacion cu Lionfish ta sigui reproduciendo su mes ainda.
Ademas e situacion aki ta bay sigui pasa tambe, pasobra e ta un pisca cu nan habitat por ta mas hundo di loke nos participantenan por sambuya, y esaki ta haci cu nan ta keda reproduci constantemente.
Sin duda e situacion aki ta demanda un esfuerso di e teamnan di participante pa nan por gara nan den e areanan cu nan ta sambuya, specialmente unda tin rifnan pa tene nan bou control. Solamente asina naturalesa mes por haya un balans. “E esfuerso di combati Lionfish seguramente mester sigui, mescos cu Lionfish ta keda reproduci y sigui aumenta”.
Trampa contra Lionfish
Sr. Boekhoudt a informa cu durante un conferencia cu recientemente el a participa na Cayman Island, ta wordo studia un forma pa gara e Lionfish den areanan hopi hundo.
Nan ta evaluando otro metodonan entre otro un cu Centro di Pesca Hadicurari kier introduci otro aña ta e uzo di un tipo di trampa efectivo pa e pisca aki. El a laga sa cu e condicion di nos lama ta ideal pa uza e sorto di trampa aki pa Lionfish pasobra nos tin un tipo di vloer marino cu ta bay di un forma gradual cu ta facilita e uzo di e trampa aki.
Igualmente den tereno academico nan lo sigui acumula e datonan cu e tipo di torneo aki ta produci pa sigui mustra cu Aruba riba un base cientifico tambe ta presente. “Un y tur mester yuda duna nan parti den combati e poblacion di Lionfish. Sea cu bo ta come nan, sea cu bo ta publica informacion di dje, of siña conoce mas di dje. Yuda di bo parti pa controla Lionfish”, el a laga sa.
Campeonato
Diasabra ultimo a conclui e campeonato nacional di Lionfish cu ta e evento mas grandi pa purba di disminui e presencia di e pisca depredado aki cerca di nos costanan. Segun Sr. Boekhoudt, 2016 a bira un aña positivo pa loke ta combatimento di Lionfish.
E biaha aki e torneo a produci 254 kilo di Lionfish gara pa un grupo di buceadonan cu a participa den e campeonato aki y cu a bira e depredadonan mas efectivo contra e pisca aki. E actividad aki pa stimula gara y come Lionfish ta un esfuerso conhunto di instancianan manera fundacion Centro di Pesca Hadicurari, Santa Rosa, fundacion Aruba Reef Care y Jolly Pirates Aruba.
Sr. Byron Boekhoudt a bisa cu 254 kilo di Lionfish ta alrededor di 1.200 pisca di tur tamaño di Lionfish cu ta yuda pa conserva e piscanan di nos rifnan.
“Si bo ta traduci esey na cuanto pisca di nos rifnan a wordo scapa, e ta un cantidad cuantioso”, el a bisa na Bon Dia Aruba.
El a probecha pa elogia e participantenan y aplaudi nan esfuerso den yuda controla e especie di pisca aki. E aña aki e cantidad di Lionfish captura a aumenta, pero e cantidad di participantenan tambe a aumenta.
Nan a organisa dos torneo tras di otro pa captura Lionfish y cu a termina diasabra ultimo. E campeon nacional tabata e team di Lionfish Go cu a bin cu 158 kilo di e tipo di pisca aki. E cantidad a surpasa tur e otro teamnan cu a participa aña pasa.
E echo cu e aña aki a wordo captura mas Lionfish cu aña pasa ta un refleho di loke a wordo pronostica for di inicio, esta cu e poblacion di e pisca aki ta sigui aumenta. Na 2011, aña cu a tuma luga e prome torneo tabata un cantidad minimal di Lionfish a wordo captura, si nos ta compara nan cu e aña aki.
Igualmente el a bisa cu e esfuerso aki tin cu sigui. Ya caba De Palm Island a anuncia y formula un invitacion pa tur participantenan bin na e prome torneo di Lionfish 2017, cu ta tuma luga den e dia 15 di januari na De Palm Island mes.
Ta wordo premira caba cu e aña venidero lo bira uno mas intensivo ainda pa loke ta trata control di Lionfish. Ya cu eventualmente lo tuma luga cuater campeonato di diferente tamaño y formato.
