(NLTimes) – Un persona mas a bin dilanti relaciona cu acusacionnan di acoso sexual, abuso of atake vincula na e programa di television, The Voice of Holland. Vocero di Ministerio Publico na Noord-Holland no kier a comenta si tambe a haci e reporte aki contra Ali B., pero su abogado a confirma cu a haci e acusacion contra dje.

Como contesta, RTL a kibra lasonan cu Ali B., al menos pa duracion di e investigacion riba comportamento sexualmente transgresivo na The Voice, segun un vocero pa RTL a confirma na ANP.

E show ta transmiti riba RTL 4 desde su inicio na 2010.

Ali B. ‘completamente ta rechasa cu el a comete un ofensa criminal’, segun Bart Swier, abogado di e musico. Swier no a duna mas comentario riba e caso.
Otro reporte di comportamento transgresivo ya a keda entrega contra e musico di rap, kende a cuminsa como hues na The Voice na 2013. Ta kere cu un ex-concursante den e show a haci e keho.

E vocero di om no kier a bisa si e caso nobo tabata relaciona algo cu a sucede hopi tempo pasa of tabata mas recien. Ainda mester evalua e reporte. No a duna un cronograma pa e proceso.

Riba diasabra, produccion y transmision di e programa a keda suspendi temporalmente pa motibo di e prome caso entrega na OM, y mas reportenan di comportamento di acoso sexual tras di cortina. Lider di banda di e show, Jeroen Rietbergen, a reconoce cu e acusacionnan contra dje specificamente tabata corecto, y a renuncia. El a bisa cu e tabatin relacionnan ‘di naturalesa sexual’ cu muhernan involucra den The Voice of Holland.

Su pareha, presentador Hulandes Linda de Mol, a anuncia cu el a termina su relacion cu Rietbergen y cu e ta suspendiendo su trabao por lo pronto. Su ruman homber ta John de Mol, e magnate di medionan di comunicacion, di 66 aña di edad, credita cu creacion di The Voice.

Cultura interno di miedo na Talpa

Cualkier persona cu ta tribi di reta John de Mol dentro di su compania hopi biaha ta paga p’e cu retiro, segun varios ex-empleado kende a papia cu AD relaciona cu e scandal na The Voice of Holland.

Ex-miembronan di personal a papia bao condicion anonimo cu e corant pa miedo con esaki por afecta nan carera den futuro. Erik de Zwart, kende a traha pa De Mol den añanan 1990 y atrobe na 2003 te cu 2006, a dicidi di papia publicamente. E productor di radio y television, persona conoci, tambe a yuda crea TMF y Radio 538. E ultimo aki eventualmente a keda bendi na compania di De Mol, Talpa, y De Zwart a bira un director na Talpa Radio Intenrational. “Tur hende tin miedo di dje. Ora John de Mol yega pia di trabao, e personal ta pone alerta. Miedo pa e hefe grandi. Si bo bay contra dje, ta un salida pa bo”, De Zwart a bisa. El a papia di un cultura di miedo na Talpa, y a yama e estado di asuntonan na e compania ‘un forma manipulativo, intimidante di liderazgo y atmosfera den cual hende ta traha’.

Otro ex-empleadonan a bisa e corant cu ta generalmente conoci dentro di e compania cu De Mol regularmente ta grocero cu hende na trabao, hasta tocante cosnan manera e temperatura den su oficina. “Tur hende tin miedo di De Mol, cien porciento”, un ex-trahador a bisa.

Riba potret: John de Mol.