E politico Otmar Oduber ayera a entrega un carta na prome minister pa loke ta trata encuentronan cu a bin tumando luga cu diferente instancia lo cual segun el a sigura, ta conduci na e necesidad di crea un dialogo nacional riba reduccion di gastonan di gobierno sin ni un tipo di menasa cu mester por tin apertura pa henter comunidad pa participa den dje.
Oduber a splica cu pa hopi aña a mira cu cada biaha cu tin un discusion riba un medida, riba aumento di cualkier impuesto of e presion di negociacion cu Hulanda, di biaha ta papia di alternativa pa loke ta trata gastonan di gobierno, pero despues por mira loke ta sosodiendo awor cu no ta hayando e prioridad di gobierno “siendo e curason di mas fuerte pa loke ta trata e dolor cu tin den gobierno su gastonan cu na Aruba ta dramaticamente halto.”
E apelacion a ser haci ayera mediante e carta ey na prome minister Evelyn Wever-Croes na unda Oduber a bisa cu no mester culpa e gobierno actual sino cu mester ta “mas autocritico” y cu mester acepta cu for di Status Aparte “tur gobierno a coopera pa cu e gastonan aki a aumenta.”
Pa e motibo ey, Oduber ta considera cu ta na su luga pa e discusion ey tuma luga y tur partido politico mester por ta di acuerdo cu esaki “mester tin e grandeza si pa nos ta bisa como partido politico, sea bo ta sostene e gobierno aunke bo ta den oposicion, cu aworaki no ta momento pa haci politikeria pasobra mi ta den oposicion, mi kier pa gobierno corta y nos ta acusa y forsa e gobierno pa bay den direccion aki of pa e gobierno cu ta na mando nos partidonan sinti cu bo ta purba hinca nan den un skina.” El a bisa.
Igualmente, Oduber a enfatisa cu su persona kier pa prome minister lidera e discusion aki, invita y inicia e proceso na unda segun el a sigura caba, gremionan ta sinti cu ta e momento pa por haci’e sin e presion, pero pa atende cu asuntonan cu ta serio y cu pa añanan a ser discuti pero no ta tuma luga pa diferente motibo.
Den e carta tambe ta indica diferente punto pa baha gastonan di gobierno, entre nan, cu tin hopi departamento di gobierno na e momentonan aki y instancianan cu a ser crea den ultimo añanan, cu den su opinion ta obsoleto, mester ser privatisa of uni cu otronan na unda por reduci e gastonan di gobierno, sin menasa e trahadonan.
