Durante un conferencia di prensa recien ex minister y politico Otmar Oduber a elabora ariba diferente topico di importancia den actualidad. Un di e topiconan aki ta e consecuencianan cu introduccion di BBO na frontera tin pa comunidad di Aruba na e momentonan aki.

Manera ta conoci BBO na frontera a drenta na vigor ariba dia 1 di september di e aña aki. Diferente organisacion, persona y politico, como Sr. Oduber, a expresa ariba diferente ocasion nan preocupacion pa loke ta trata e consecuencianan grandi cu e introduccion di BBO na frontera lo tin pa comunidad. Awe por mira e realidad cu comunidad ta bibando cu e cambio aki cu ta afecta e costo di bida ainda mas.

Oduber a señala cu hopi biaha e ta tende of mira discusion ariba e prijs di productonan na supermarket y con ciudadanonan ta purba informa e resto di comunidad unda ta miho pa cumpra cuminda, na cual supermarket e prijsnan ta miho, pero mayoria establecimento ya a aumenta prijs di nan productonan pa motibo di e decision cu a tuma pa introduci BBO na frontera.

“Tur caminda cu bo bay, vooral den e dianan aki cu scol a cuminsa di nobo, articulonan pa scol, paña pa hendenan, si bo mira e consecuencia dramatico cu esaki tabatin, ta mustra un biaha mas cu e decision cu ta wordo tuma sin duna e espacio necesario pa por discuti ariba e temanan aki. E unico grupo den nos comunidad cu ta carga e consecuencia di e decisionnan aki ta comunidad mes. Ta e habitantenan di Aruba ta esunnan cu tin cu bay paga entre 40 pa 60 miyon florin adicional cu gobierno ta bay saca for di comunidad,” el a indica.

Oduber ta splica cu el a trece e punto aki un biaha mas pasobra dos siman pasa, durante otro conferencia di prensa, el a lansa e pensamento y idea pa un dialogo nacional. El a haci un suplica na gobierno di Aruba, na tur partido den oposicion, den parlamento of pafo di parlamento, pa sinta na mesa y dialogo ariba e gastonan di gobierno.

“Lamentablemente atrobe bo ta mira cu tur esnan cu ta papia di un politica nobo no ta gara e peticion aki cu pa nos por cuminsa discuti ariba gastonan di gobierno cu mester wordo baha, controla y pa evita den futuro cu mas di e tipo di medidanan aki ta bin riba comunidad,” el a remarca.

No ta un secreto cu costo di bida na Aruba ta super halto y esaki, Oduber ta resalta, no ta laga espacio mas pa comunidad. “Nos no ta papiando di popularmente bo ta bay crea pobresa, no ta cuestion di papia cu si bo tin un grupo den nos comunidad cu no por carga e consecuencianan di e medidanan cu ta wordo introduci, pero e realidad ta simpel tur hende na tur nivel henter nos comunidad ta sinti e prijsnan enorme cu a bay halto y e gastonan di costo di bida y di haci negoshi cu practicamente no por wordo carga mas,” el a agrega.

El a enfatisa cu tur consecuencia di decisionnan cu wordo tuma ta pasa pa e comunidad. Cualkier medida cu wordo introduci of ahustacion cu wordo tuma, ta un peso adicional pa e comunidad di e isla. Esaki, el a subraya, na su turno ta bay crea problemanan social, cu ya ta existi den comunidad, y problemanan psicologico cu ta bay traha ariba e mente di e ciudadanonan na Aruba.

Oduber a menciona tambe cu prijs di awa y coriente y prijs di tur loke ta trata productonan necesario pa por biba, comunidad no por sigui cu e prijsnan asina halto mas. El a agrega cu gasolin tambe ta un gasto grandi y aunke prijs di gasolin ta subi un dia y baha e otro dia, pero durante e ultimo añanan e prijs di gasolin a subi dramaticamente. El a enfatisa cu mientras no tin discusionnan pa loke ta trata reduccion di gastonan di gobierno y haci e aparato di gobierno mas eficiente, no ta bay tin un solucion.

“Aki mi ta papia di tur politico na Aruba, e yamada ta na cada un di nan pa ban mira con nos ta reduci gastonan cu tin den gobierno. Ban haci un dialogo nacional na e momentonan aki, yama tur hende hunto laga nos tin e grandesa como politico di bisa cu nos ta dispuesto pa sinta hunto na mesa. Mester atende cu un situacion cu e pueblo no por atende cune,” Oduber a subraya.

El a remarca cu pueblo ta depende di instancianan, gremionan y di e cuerpo politico di Aruba pa e cambionan necesario por tuma luga. Y ta e gobierno actual, gobierno den coalicion na e momentonan aki, ta esun cu mester tuma e prome paso, yama tur hende na mesa y sinta hunto pa dialoga y delibera ariba un solucion.

“Mester pensa riba e futuro generacionnan cu aki 10 aña tin cu biba di e decisionnan cu ta wordo tuma awe y p’esey nos a papia ariba reduci gastonan di gobierno, nos a papia entre otro riba diferente ideanan,” el a señala.

E politico a remarca cu tambe cu na Aruba tin entre 12 y 15 mil persona indocumenta cu ta traha y no ta paga AZV, no ta paga SVB, no ta paga belasting na Aruba y no tin cuenta di banco pa nan por participa den economia di Aruba.

“Nos no tin niun hende hortando eyfo, nos no tin niun hende bibando bao brug, nos no tin niun hende bibando bao di un palo, nan niun no ta muriendo di hamber, dicon pasobra nan tur ta trahando, pero nan ta trahando preto. Tur caminda nan ta trahando indocumenta, nan no ta paga AZV, nan no ta paga SVB, no ta pagando belasting y tampoco tin cuenta di banco pa participa na economia di Aruba,” el a resalta.

El a enfatisa cu si e hendenan aki aporta na tur e fondonan menciona, por logra yega na e punto na unda e pensionadonan, cu ta pagando entre 6.5% y 9.5% di prima di AZV, por haya un alivio.