Otmar Oduber ta pidi reunion publico urgente riba RAft

Ayera, durante un conferencia di prensa, lider di partido PPA, Otmar Oduber a anuncia cu el a haci un solicitud na presidente di Parlamento di Aruba, Gerlien Croes, pa un reunion publico cu caracter di urgencia riba e Ley di Reino pa Supervision Financiero.

Den e carta, fecha 15 di januari 2024, Oduber a bisa cu durante e reunion urgente “lo mester atende cu e hecho cu dentro di poco, Aruba lo mester dicidi ariba e hecho si ta firma y bay di acuerdo cu e ‘Rijkswet Aruba Financieel Toezicht’ [RAft] manera proponi pa prome cu 1 di mei venidero, y claro hopi importante e ‘uitvoering’ di esaki mediante e asina yama ‘Landspakket’ proponi, cu su adaptacionnan.”

Oduber ta bisa den e carta cu e motibo pa atende e topico “importante y historico aki” cu urgencia ta e hecho cu “nos ta den un formacion di gobierno cu ainda no tin un tempo defini pa concretisa,” mientras cu e deadline cu tin pa tuma un decision y concretisa e acuerdo aki, ta apenas dentro di tres luna di tempo.

Segun Oduber, “considerando e hecho cu gobierno ta den formacion y cu e constelacion di Parlamento despues di eleccion ta totalmente diferente,” ta haci un peticion urgente pa presidente Gerlien Croes convoca e reunion aki lo mas pronto cu ta posible, “y asina cada fraccion den Parlamento por pone nan posicion cla y raspa dilanti conforme e proposicionnan haci den campaña como tambe e diferente posicionnan tuma den debatenan electoral, unda varios partido a expresa nan preocupacion y desacuerdo cu e ley manera presenta y poni riba mesa aki.”

For di comienso di e discusion riba RAft, Oduber a expresa su sosten pa e ley, poniendo e responsabilidad pa loke a sucede no riba Hulanda, sino riba gobiernonan local, cu e ta bisa, a faya den bon maneho financiero. Na 2023, el a enfatisa cu a perde den e añanan di discusion pasobra di momento cu tabatin CAFT pa awe ta papia di RAFT, casi 10 aña a pasa y e unico diferencia ta cu aworaki Aruba ta perdiendo completamente su autonomia financiero cu tanto lucha a costa politiconan den pasado pa Aruba tin su propio maneho financiero.

El a remarca cu e ta un otro nomber, den mesun accento cu tur otro y cu ta significa cu en bes di Parlamento di Aruba dicidi ariba e situacion di pais Aruba, e maneho financiero, Den Haag cu Tweede Kamer ta esunnan cu ta bay dicidi unabes cu RAFT wordo firma.

“Politico di Aruba a crea RAFT pasobra nos a percura pa Hulanda no tin confiansa den nos, pero esey no ta kita cu nos tampoco no ta confia Hulanda, pasobra Hulanda a usa nos na momentonan cu nan tabata sa cu nos ta vulnerable pa nan por yega na e punto caminda nos ta awe. Ora nos tabata den pandemia y cu nos a firma tur sorto di documento pasobra nos tabatin e necesidad, nos mester a corda ariba e consecuencianan cu esaki ta bay tin pa nos pais,” Oduber a enfatisa.

El a splica, mirando e situacion y e debe cu Aruba ta aden pa e proximo añanan cu ta bin, cu mester yega na un conclusion nacional cu un gobierno di cuater aña no por mara un pais na 20 of 30 aña di debe.

El a remarca cu mester presenta e cambio aki den e leynan di Aruba y den Constitucion si ta necesario, cu si un gobierno kier mara e pais na mas cu tanto aña, por ehemplo mas cu 10 aña, di debe mester tin no solamente un mayoria den parlamento, pero e gobierno mester tin sikiera un dos tercera parti den parlamento cu ta respalda esaki.

“No ta husto pa ningun gobierno pone nos den e posicion manera nos ta na e momentonan aki, pero tampoco ta husto cu un gobierno ta bisa cu aworaki tin un discusion cu pa motibo cu nos mes no a cumpli cu Hulanda,” Oduber a señala.

Segun el a sigui splica, den tur departamento na Aruba, Hulanda ta tumando over y pues esey kiermen cu e discusion cu tin awe cu si Aruba ta Status Aparte, si e pais ta soberano, si Aruba ta independiente si of no financieramente, si esey ta bay haci un diferencia ariba e situacion financiero cu tin y pa loke ta trata e obligacionnan cu tin, pa entre otro un RAFT, el a remarca cu no por otro.

“Bo a firma caba como gobierno. Bo a endeuda den un temporada cu Hulanda a gara bo na rudia, cu ta e momento di Covid, cu 916 miyon florin di debe, cu si bo no firma awe, e ora Hulanda ta bisa nan no ta fia e placa pa paga e debe. Na cua parti mundo Aruba lo por bay cu un debe cu a crece riba un biyon djis door di pandemia? Pasobra niun instancia internacional no ta bay duna bo e placa aki mas,” el a resalta.

El a indica cu Gobierno di Hulanda tin gobierno lomba contra muraya y ta bisa cu mester firma e Ley di Reino pa Supervision Financiero. El a agrega cu e unico discusion cu por tin ainda ta con Aruba por sali miho para for di e situacion y kico por pone den dje cu por haci inversion na Aruba den enseñansa, den salubridad y adultonan mayor.

El a subraya cu e condicionnan ey mester discuti cu Hulanda y gobierno mester firma manera cu Hulanda ta pidi y obliga, pasobra nan a acorda cu Hulanda caba cu esaki ta e caminda cu ta bay cana.

E tempo aya caba, Oduber a haci un yamada di sinceridad y obhetividad na e politiconan. El a enfatisa cu ya no ta importa ken ta pro of contra, segun el a remarca, no tin otro opcion.

Y esaki ta e mesun sentimento y posicion cu el a expresa den e carta cu a manda Presidente di Parlamento. “E tempo ta awo pa nos por forma un Frente Nacional, entre tur partido politico, gremionan y instancianan local pa fiha un posicion comun y negocia ainda cu gobierno di Hulanda pa un avenida mas husto, sin discriminacion y respetando e derecho autonomo cu Aruba tin y pa cual a tuma decadas di lucha y sacrificio di e mesun pueblo Arubano, mediante practicamente tur partido politico ainda existente, manera AVP, PPA y MEP, y claro awe cu” participacion di partidonan nobo manera Futuro.

“Ta keda na nos madurez politico awe, pa mustra y convence Hulanda cu e constelacion nobo aki di Parlamento por tin alternativanan real y convincente pa logra, mediante nos gobierno aki na Oranjestad, e mesun meta cu ta wordo desea, pero sin tin cu sacrifica e lucha y derecho obteni, mediante nos Constitucion.

“Tempo ta esencial y un tema asina crucial y determinante pa e futuro di nos pais no por warda, y cada dia cu pasa lo pone nos Parlamento y nos futuro gobierno su lomba contra muraya. Ban mustra un diferencia y responsabilidad pa cu nos comunidad, unda kier bolbe haci un suplica riba su persona pa yama e reunion publico aki mas pronto cu ta posible, invitando asina gobierno y esnan encarga cu e tema aki,” el a finalisa.