Otmar Oduber: “Ta momento pa cuminsa un dialogo nacional pa baha gasto di gobierno”

Continuando cu e diferente topico cu Bon Dia Aruba a trece dilanti den entrevista cu e politico Otmar Oduber, el a bisa cu “ta momento pa cuminsa un dialogo nacional pa baha gasto di gobierno” na unda el a sigura cu pa haci esey mester como por ehemplo, independisa departamentonan di gobierno.

Asina Oduber a splica cu el a bisa na prome minister Evelyn Wever-Croes cu mester ta hunto pa drecha erornan den pasado cu un vision di na unda nan mester bay y cu ta momento pa awe mes cuminsa cu un proceso di un dialogo nacional pa baha gastonan di gobierno independisando, privatisando of eliminando departamentonan cu no ta necesario, “nos no mester bay paga ni un compania cu tur sorto di rapport cu a traha durante añanan.”

Pa loke ta trata impuesto di BBO na frontera cu ta bay introduci oficialmente dia 1 di augustus, Oduber a señala cu esey no ta lo miho pa e pueblo, “e ta e miho cos pa gobierno, pa haya placa pero nos tur sa y nos ta bisa cu curashi cu loke mester a bin ta un BTW, ta bay crea un inflacion di por ta un aña of dos aña pero e pueblo na final di dia ta bay tin mas placa den su saco, esey ta e BTW cu ta duna e oportunidad di bay directo y bo ta duna comunidad pa paga un tiki mas, pero den mi saco mi tin mas placa y a mi ta dicidi na unda mi ta gast’e, tabata mas dificil pa bende y ta mas facil pa pone un BBO na frontera.”

Tin gobernantenan manera Oduber tambe a expresa cu ta bisa cu e impuesto aki no ta bay aumenta costo di haci negoshi pa ni un comerciante y tampoco ta bay costa na pueblo nada, pero, el a puntra na cualkier minister cu ta sostene e BBO aki di na unda ta bay saca e 40 miyon florin cu ta bay haya adicional?

“E realidad ta cu bo ta poniendo un peso enorme atrobe riba comunidad di Aruba cu nos no a sinti ainda, laga nos corda cu ya caba costo di bida ta halto, ainda ta falta e efecto cu ta bay bin den e proximo seis luna pa loke ta trata e medida aki na frontera,” el a bisa.

Tocante e pregunta si Oduber ta di acuerdo cu ley di Reino pa supervision financiero (Rijkswet Aruba financieel toezicht ‘RAft’) el a comenta cu mester tin un supervision “awor mi no ta kere cu Hulanda ta e miho pa bisa con e supervision ey mester ta, pasobra Hulanda a pone un CAft riba nos durante shete of ocho aña y nan a supervisa, den e shete of ocho aña ey e cos a bira pio.”

Aunke e tabata existi y tur hende tabata critik’e manera el a bisa, cu politicamente ta bring’e pa autonomia, na final di dia ta Hulanda tabata na cabes di e CAft y esey no a mehora, loke ta nifica cu bao e supervision di Hulanda e cosnan tambe a bay robes “e ora ey mi ta kere cu bo mester ta sincero cu Hulanda, nos mester acepta cu tin erornan cu a ser cometi, cu ora bo ta comete un eror bo ta busca e confiansa back,” el a expresa.

“Si bo tin un condena bo no por keda den un funcion publico”

Pero ta keda un hecho cu caso Flamingo ta continua unda su persona te ainda ta envolvi den esaki, a puntra na Oduber si den futuro e ta forma parti di proximo eleccion y ta keda scogi pa pueblo pero lo por ta e caso di por haya un condena, manera Benny Sevinger a hay’e y te ainda ta keda parlamentario, e lo keda den funcion cu pueblo a scoge p’e?

El a contesta cu su persona tin cu respeta su mes “si bo tin un condena bo no por keda den un funcion publico y tempo pasa no tabatin ley contra esey, awor tin ley y e principio ey di parti di integridad di mi persona no a cambia, ma bisa semper cu si den cierto momento mester tin un condena si mi tabata den funcion como minister of parlamentario mi ta retira di biaha.”

“Ministerio Publico a perde nan cara di hopi erornan cu nan a haci”

Tocante e caso Flamingo mes, el a sigura cu ta andando y el a cuminsa papia di esey for di algun luna pasa despues di tres aña den silencio pa motibo cu el a sinti cu el a coopera cu loke el a mester coopera cune “na cierto momento mi tabata sinti cu tin un abuso di poder di Ministerio Publico y nan a perde cara di hopi erornan cu nan a haci, esey ta e realidad nan a persigui hopi hende y despues na final nan a bisa sorry of disculpa, ora tin un investigacion tumando luga bo no sa kico nan ta investigando, ora ma bay encarcela ta e momento pa mi haya sa pakico nan ta persiguiendo, nan tabatin un acusacion di shete articulo den ley contra mi cu mi tabata laba placa, enrikece mi mes, cu mi tabata den un organisacion criminal, corupcion, sinembargo, esaki logicamente no tabata berdad y cu nada di esaki a ser proba.” El a sigura.

Aworaki e kier pa Ministerio Publico hib’e dilanti corte pa e sigui mustra su inocencia manera el a expresa, “cu den tur loke tin na e momentonan aki comunidad por ta trankil cu ta simplemente manipulacion politico cu a tuma luga, cada un di e dudanan cu Ministerio Publico cu nan ta considera cu mi kier bay un caso toch, nos ta sigur cu nos tin un respuesta pa cada un di nan.”

Tambe el a bisa cu keda keto no ta un opcion riba e situacion politico di e pais mirando kico ta tumando luga durante e ultimo añanan y e consecuencianan di diferente gobernacionnan di e cual e mes tabata forma parti di dje “no tabatin un politico cu a tuma e decision den un partido grandi cu 4.000 voto y a mi a baha, ni un hende a baha mi,” tambe e ta considera cu si tin cosnan cu ta bayendo bon y den esaki el a elogia minister Dangui Oduber debi cu turismo di Aruba ta bayendo bon manera cifranan ta indica, “tur hende a cuestiona mi pero kico bo kier pa mi haci? pasobra mi ta un politico di oposicion mi tin cu ataca cu turismo ta malo? Turismo no ta malo, nos por drech’e miho y ma elogia Sr. Dangui pa continua cu e maneho cu a mi a laga atras den ATA sui generis lo cual a resulta e exito mas grandi den henter area aki.”

“Mester bin un cambio den DIMAS cu ta un deficiencia enorme cu ta perhudicando comerciantenan”

Igualmente el a trece dilanti cu e no ta di acuerdo cu minister di Integracion Glenbert Croes pero cu tin cu bin cambio den DIMAS, “masha tempo caba nos mester a haci cambionan, nos tin entre 10.000 pa 12.00 persona indocumenta na Aruba, cu por ta hasta mas, pero e hendenan aki no ta hortando, tur e hendenan aki ta trahando, pero e problema ta cu nan ta trahando sin contribui na tur e fondonan di gobierno y obligacion cu tin na Aruba, pa loke a yega e momento cu si e doñonan di trabou ta prueba cu e hendenan aki ta trahando dicon nos no ta legalisa nan? P’esey mester bin un cambio den DIMAS cu ta un deficiencia enorme cu ta perhudicando comerciantenan y ta crea fondonan pa nos pensionadonan,” el a finalisa.