Ayera mainta durante un conferencia di prensa, ex-mandatario Otmar Oduber a declara publicando, hunto cu abogado Vito Carlo, cu el a entrega un keho na landsrecherche pa asina inicia cu e proceso di denuncia contra ex-minister y actual parlamentario pa partido MAS, Marisol Lopez-Tromp, pa supuesto denuncia falso cu Lopez-Tromp a entrega den su contra.
“En berdad mi tabata na landsrecherche un biaha mas y den e proceso di transparencia cu ta tumando luga y pa mustra na comunidad di Aruba cu lo sigui tuma luga. E proceso manera mi a splica pa loke ta trata un keho contra ex-minister Marisol Lopez Tromp ta den su proceso na e momentonan aki”, Oduber a declara.
El a splica cu na juni 2020 a cuminsa un investigacion cu nan a yama e tempo ey Flamingo y te ainda ta carga e nomber ey, caminda cu tabatin acusacion of sospecha den su contra. Pero despues di dos aña a resulta cu ni uno di e sospechonan aki el a wordo interoga riba nan, ni uno di tur e documentonan cu nan a tuma den beslag e tempo ey na su cas, computer, telefonnan etc., ni un solo pregunta a wordo haci ariba e documento y artefactonan cu a wordo tuma den beslag e tempo ey.
Segun Oduber ta indica, a resulta despues den interogacion na juni 2020 cu e entrada hudicial den e caso Flamingo a cuminsa, a resulta pa ora Oduber a wordo aresta y a bay den detencion, cu no a considera esey mas na e momento ey, si no cu tur cos a bira un acusacion. Den e caso aki, segun Oduber, ta resalta un acusacion falso di ex-minister y actual parlamentario Marisol Lopez-Tromp cu a wordo duna na final di juli, un luna y mey despues cu nan haci invasion na Oduber su cas y cu eigenlijk el a ricibi su pertenencianan back.
“Mi ta bolbe ripiti cu ni un solo pregunta a wordo haci ariba tur e acusacionnan cu tabatin e tempo ey. Nos tur ta corda como siete acusacion di articulonan di ley cu mi tabata hinca den labamento di placa, cu mi lo tabata hinca den organisacion criminal, cu mi a enrikece mi mes etc. Tur e puntonan ey a resulta, te dia di awe, cu no tin ni un solo pregunta riba dje”, Oduber a subraya.
Oduber a sigui splica cu dia cu el a sali el a tuma nota, hunto cu su abogado, di kico tabata e acusacion cu tabatin di parti di Lopez-Tromp, cuater punto. E acusacionnan a wordo treci dilanti despues cu e tempo ey policitamente e tabata activo como lider di partido POR, y cu confiansa a wordo kita for di Lopez-Tromp, a conduci na e actuacion aki di parti di Lopez-Tromp. Pa e motibo aki, hunto cu su abogado, Oduber a inicia e proceso pa un demanda contra e parlamentario actual pa e acusacionnan falso.
Oduber a indica cu el acudi un biaha mas Landsrecherche den e proceso aki, pa entrega un keho contra Lopez-Tromp pa e acusacion falso cu su persona a entrega – cual el a remarca cu no ta prome biaha, referiendo na e incidente cu tabatin den Parlamento di Aruba cu tabata envolve Sr. Chris Dammers. Oduber a resalta cu e indicdente ey tabata un otro caso cu a wordo regla na banda, pa motibo di un acusacion falso cu a tuma luga e tempo ey tambe di parti di Lopez-Tromp contra Sr. Chris Dammers.
“E proceso ta andando aworaki no solamente pa e acusacion contra e ex-mandatario pa e mentiranan cu el a trece dilanti, pero tambe den e caso aki, riba tur cuater punto riba cual dos of tres mi a wordo cuestiona. Nos lo trece prueba di tur e procesonan, cu Lopez-Tromp no solamente a gaña Landsrecherche y Ministerio Publico, pero cu Lopez-Trump como ex-minister tabatin tur disposicion di documentonan cu tabata back-up pa mustra cu loke el a presenta na Ministerio Publico tabata un mentira”, Oduber a subraya.
El a enfatisa cu Lopez-Tromp tabata na altura cu loke el a bay haci na Landsrecherche na juli di aña 2020 tabata un acusacion falso, pasobra e tabatin tur e back-up y documentonan necesario pa sa cu loke e tabata haciendo na Landsrecherche na e momentonan ey por y a causa un daño enorme na Oduber su persona, na su famia, na su negoshinan y pa cual Oduber a cuminsa e proceso den su contra.
Oduber a remarca cu tin suficiente prueba, proceso y conocemento, y cu esaki bay mas leu, pero no a duna detaye, siguiendo conseho di su abogado. Sinembargo, el a indica si cu tin hopi mas detaye cu nan ta dunando na landsrecherche na e momentonan aki, pa mustra cu tabatin un acusacion falso cu a wordo entrega y cu esaki tabatin consecuencia hopi grandi pa su persona.
Di su banda, abogado di Oduber, Sr. Vito Carlo a resalta cu comunidad no mester wak e keho aki como un revancha cu su cliente ta tuma contra Lopez-Tromp. El a splica cu ley ta exigi cu si un ciudadano tin conocemento di un hecho castigabel, e tin obligacion di denuncia esaki, y durante e interogacionnan su cliente, Oduber, a realisa cu e denunciante a haci un denuncia falso. Na momento cu el a realisa cu esey tabata e caso, Oduber a haci un denuncia contra e denuncia falso, loke “ta un obligacion pa ley”, Carlo a enfatisa.
Carlo a agrega tambe cu no a haci e aangifte ainda, esaki ta den e proceso. Pero e consecuencia cu esaki tin ta cu Landsrecherche ta tum’e, nan ta presenta esaki na Ministerio Publico y Ministerio Publico lo wak si e aangifte tin merito, pa asina despues nan tuma decision ki consecuencia legal lo bay tuma contra di e acusado.
