Durante conferencia di prensa e siman aki, Otmar Oduber di Plataforma Pais a elabora riba metemento politico den Ministerio Publico y corupcion den e organo aki. El a enfoca specificamente riba caso Flamingo, cual den algun siman di tempo lo cumpli 5 aña desde cu investigacion a cuminsa contra su persona.

Algun siman atras, Otmar a indica cu politica ta meti diki diki den Ministerio Publico y awe e ta mas convenci cu nunca cu Ministerio Publico ta wordo maneha politicamente. E ta bisa tambe cu Ministerio Publico ta presta su mes na corupcion. “Un officier van justitie trahando pa Ministerio Publico ta permiti pa procesverbaalnan falso wordo traha, a traha 7 rapport di BCI falso,” Oduber a bisa den un comunicado di prensa. Segun Oduber, e officier aki tabatin tur acceso di mundo na 2019 na tur documento na DIP.

E tempo ey durante investigacion di caso Avestruz, Otmar Oduber, cu tabata minister, a duna opdracht na director di DIP pa duna acceso na tur documento, incluyendo e documentonan procesa durante maneho di Oduber mes. Pero segun Oduber, “e meta no tabata esey, e meta tabata pa yega na Otmar Oduber na un of otro forma.” E ex-minister ta bisa cu a haci uso di e rapportnan falso aki pa drenta cas di Oduber na juni 2020. “Awe e caso ta den corte y e 7 rapport aki a wordo tira den prullenbak door di Ministerio Publico pasobra nan no tin cara pa enfrenta e acusacionnan cu tabatin den e rapportnan aki,” Otmar a declara.

Mas aleu e ta bisa cu Landsrecherche ta haci uso di strategianan abusivo y falso. “Ora ta malinforma, ora ta malusa testigonan, usa strategianan pa nan bisa cosnan cu bo kier scucha pa acusa otro hende, bo ta lubida cu ora e 31 testigonan declara–di cual 22 a declara caba–lo realisa cuanto… mentira y trocemento di berdad door di Landsrecherche a tuma lugar.”

Tambe Oduber a expresa cu Ministerio Publico ta permiti manipulacion di prueba, cu nan ta conspira pa perhudica ciudadanonan cu e meta pa scapa nan cara, sin laga afo e aspecto discriminatorio di e entidad aki unda ta permiti Hulandesnan Europeo bin Aruba y ta mal usa localnan den Landsrecherche. Di e 3 persona di Landsrecherche cu a pidi pa wordo scucha – dos Arubiano y un Hulandes – Landrecherche a bisa cu un di e dos Arubiano, e persona cu a traha e 7 rapport falso, a fayece y naturalmente no por wordo scucha; e otro no ta importa pa laga su identidad bira conoci; pero esun Hulandes Europeo a pidi pa no laga su identidad bira conoci. Segun Oduber, e persona aki ta esun cu a bisa cu e 7 rapport falso ta confiabel y di e forma aki a malogra bida di Otmar Oduber ya caba pa 5 aña.

Oduber ta cuestiona cual ta e motibo cu kier proteha identidad di e persona aki y pio ainda, ta manda un otro carta bisando cu nan ta lamenta cu nan peticion di proteccion pa e Hulandes Europeo a wordo publica y trata den prensa.

Durante e conferencia di prensa, Oduber a mustra prensa un carta di Procurador General dirigi na cabes di Gobierno di Aruba den cual e ta informa riba con e casonan ta andando. Segun Oduber, ta parce cu gobierno ta pidi pa dun’e material pa persigui director- y ministernan. “Si esaki no ta metemento politico, awe Ministerio Publico bin busca mi awe tardi.”

Oduber a presenta otro carta caminda PG (anterior) lo a pidi pa no schors un persona debi cu e ta cooperando hopi bon den e caso Flamingo y su cooperacion ta necesario ainda. Es decir, hende no a wordo geschors pasobra Ministerio Publico a bisa DRH, gobierno y ministernan pa no haci esaki ya cu e ta dunando informacion riba Oduber, y cu despues lo regel e situacion di e persona aki, riba cual tabatin investigacion.

Caso Flamingo

Investigacion Flamingo tin di haci cu practicanan fraudulento tempo ex-minister O.O. tabata minister di ruimtelijke ontwikkeling, infrastructura y medio ambiente durante e periodo di november 2017 te december 2019. E hechonan castigabel cu a persigui ta estafa, mal uso di poder, corupcion (activo y pasivo) y falsificacion.

Ya varios biaha Oduber ta denuncia diferente aspecto di caso Flamingo. Caso Flamingo a cuminsa pa motibo di e acusacionnan a bin door di un proces verbal crea pa BCI, Bureau Criminele Inteligentie di Polis. Na april di aña pasa, Oduber a entama un caso contra Ministerio Publico, RST y KPA. Esaki pa motibo cu, segun Oduber a splica, desde cu investigacion den caso Flamingo a caba, OM – of den e caso aki, Procurador General – no a tuma un decision den e caso. Ademas, november ultimo el a entrega un keho adicional relaciona cu e ocho acusacion inicial cu a duna inicio na Caso Flamingo. E tempo ey caba, Oduber a trece dilanti e critica contra tres funcionario; un ta e hefe encarga cu Departamento di BCI den Cuerpo Policial di Aruba, otro ta un miembro di Landsrecherche y e ultimo ta un miembro di RST, manera Bon Dia Aruba a publica e tempo ey.

Caso Flamingo tin otro sospechoso cu tambe ta acusa di diferente acto castigable. September ultimo, Ministerio Publico a informa cu a cera un acuerdo di transaccion den e caso Flamingo contra e sospechoso Humprey Anthony Croes pa un suma di Afl. 25,000.

Croes ta sospecha di a soborna activamente un trahado di oficina di minister di desaroyo teritorial, infrastructura y medio ambiente (ROIM) den e periodo di november 2017 te augustus 2020.E multa maximo cu segun Codigo Penal di Aruba por impone pa e delito aki ta Afl. 25,000. Por lo tanto, e total di e transaccion cu a acorda ta igual na e multa maximo.

Ministerio Publico ta opina cu tin suficiente prueba contra Croes y cu e hecho di cual e ta ser culpa por tambe comproba. Considerando tur hecho y circunstancia, incluso e hecho cu no tin victima of partinan perhudica di kendenan nan interesnan lo por ser perhudica door di realisa un transaccion, Ministerio Publico ta mira e transaccion menciona como un solucion adecua pa Croes.

Un luna despues, na october 2023, Ministerio Publico informa cu a cera un acuerdo di transaccion den e caso Flamingo cu e sospechoso H.J.P. Geerman pa un suma di Afl. 125,280.13.

Geerman tabata sospechoso di a estafa Pais Aruba y di corupcion activo di minister di Desaroyo Teritorial, Infrastructura y Medio Ambiente (ROIM) durante e periodo di prome di april 2019 te 30 di maart 2021. Den e investigacion, Geerman a wordo identifica como un asina yama ‘spookambtenaar’ of ambtenaar spirito.

Ministerio Publico ta opina cu e investigacion a mustra cu e minister a nombra Geerman como medewerker bedrijfsvoering, pero cu e no tabatin mester a haci ningun trabao a cambio y cu e no a haci ningun trabao tampoco. A cambio pa e sueldo cu el a cobra di Pais Aruba, e tabata si haci propaganda pa e minister na radio.

Ministerio Publico ta di opinion cu door di esey, Geerman a haci su mes culpable na estafa y corupcion. E suma di transaccion ta consisti di pago di un suma di placa di en total Afl. 125,280.13. A yega na e suma aki door di conta e boet di Afl. 5,000,- plus henter e suma cu Geerman a ricibi inhustamente di Pais Aruba, esta, Afl. 120,280.13.

Considerando tur hecho y circunstancia, incluso e hecho cu no tin victima of partinan perhudica di kendenan nan interesnan a wordo perhudica di algun forma of otro door di realisa e transaccion aki, Ministerio Publico ta considera cu e transaccion menciona ta un acuerdo apropia pa Geerman.

Den ambos caso, OM a enfatisa cu e acuerdonan aki no tin influencia riba e curso di proceso penal contra e otro sospechosonan den caso Flamingo.