Diahuebs ultimo dia 16 di maart, manera a keda publica den nos edicion anterior, Corte Superior a dicidi cu e keho di Sr. Candelario ‘Booshi’ Wever contra ex minister Otmar Oduber pa e compra di incinerador chikito no ta admisibel. Ayera mainta, durante su conferencia di prensa, Oduber a reacciona ariba e punto aki tambe.
Diabierna Ministerio Publico a saca un comunicado caminda a indica cu Wever a dirigi su keho contra e hecho cu Ministerio Publico no a tuma un decision pa persigui, entre otro, Oduber pa soborno, falsificacion y estafa pa loke ta e destaho y otorgacion di compra di e incinerador chikito na dump di Parkietenbos.
Wever a sigura cu iregularidadnan rond di destaho publico pa loke ta trata e incinerador aki, cual tabata diseña pa exclui otro companianan di participa. Na 2019, Wever a bay Ministerio Publico pa entrega un denuncia contra e ex mandatario y a entrega tur e pruebanan cu mester pa cuminsa haci un investigacion, incluyendo parlamentarionan, manera el a sigura, pero esey no a sucede
Mirando cu Ministerio Publico no a persigui Oduber, locual el a haya inaceptabel, el a dicidi pa bay Corte Comun pa nan haci investigacion, pero diahuebs ultimo Hof a declara su keho inadmisibel.
Oduber a reacciona ariba esaki a indica cu Wever, manera algun otro persona, kier daña su nomber cu “acusacionnan falso y mentiranan”. El a sigura cu e incinerador chikito no a costa pueblo nada pasobra tabata cu fondo di desaroyo hunto cu Hulanda e tempo ey a yega na cumpra esaki.
“Booshi a haya ta bon pa bolbe purba lastra nomber di Otmar Oduber, bay Ministerio Publico entrega keho. El a bay Hof. Mi tin un mensahe na Booshi Wever, mi ta spera cu di berdad si amor e tabatin pa mi, pa e termina, mi no ta interesa den dje. Pa Sr. Booshi Wever compronde tambe cu si e ta un politico cu a termina su carera como un fracasado, Otmar Oduber a bay laga su carera politico den su gloria,” Oduber a remarca.
Na mesun momento el a subraya cu e incinerador ta “un ehempel cu paisnan den region ta bin Aruba pa wak con nos ta haci’e.” El a menciona cu e incinerador a resulta “asina bon” cu DOW, segun el a compronde, kier busca dos mas pa asina yuda cu e desperdicio su mester wordo kima.
