Ex-minister Otmar Oduber a yama un conferencia di prensa, pa asina duna di conoce su reaccion pa e acusacionnan cu diabierna ultimo minister Marisol Lopez-Tromp a expresa contra su persona, durante e reunion publico den Parlamento.

Oduber a informa cu 1 di juni oficialmente el a retira for di partido POR y politica. Ademas el a bisa cu e no tin mas contacto cu e minister di Husticia, Andin Bikker desde dia 4 dia juni, riba cual Bikker a keda como lider di partido.

“Pa loke ta trata e diferente insinuacionnan cu mi persona ta guia e partido for di patras, esey absolutamente no ta berdad”, Oduber a resalta.

El a acepta cu e si tabata duna conseho pa gobierno, specificamente pa prome minister Wever-Croes y comision cu tabatin di Covid-19. Un rapport a wordo traha pa partido POR pa locual el a duna di conoce e posicion cu e tabatin y tambe a bisa cu el a yuda minister Bikker ‘gratuitamente, sin cobra un florin’.

Tocante acusacionnan cu minister Lopez-Tromp a trece dilanti den Parlamento, Oduber a expresa cu e kier pa algun persona presenta algun prueba pa e acusacionnan cu a wordo treci dilanti. Ademas el a expresa cu ora el a haya sa cu a bisa riba diferente rednan social cu e tabatin personanan cercano na dje, cu a wordo traslada pa DIP – den caso aki el a menciona Michael Carty cu tabata gana 10.000 florin – Oduber a sigura cu el a haya un carta for di director di DIP di luna di december di 2019, na unda tabata bisa cu e director a pidi pa Carty traha na DIP pa haci diferente trabou cerca dje.

El a mustra pa e medionan di comunicacion presente e contract di Carty, e cual ta regarda e salario mensual den cual e ta haya 3.875 + 25% di compensacion pa luna.

Di loke ta trata trahadonan “spirito” cu minister Lopez-Tromp tambe a conta den reunion publico, esta personanan cu ta traha den gobierno, Oduber a expresa cu e persona mester ta un bon actor di Mascaruba pa por purba pretende cu na Aruba por traha siendo un spirito.

“Mi kier sigura bosonan cu tur cos ta transparente, ami si ta bin cu pruebanan” Oduber a manifesta.

Tambe el a reta minister Lopez-Tromp pa trece un peticion aworaki cu e ta un ciudadano sin inmunidad parlamentario pa haci algo cu ta contra ley. Di igual manera el a laga sa cu di e shete biaha cu el a papia cune, 5 tabata pa discuti e maneho cu e ta hibando den su antiguo ministerio, cu el a expresa cu no ta bayendo bon.

Otro punto cu Oduber a comenta ta e topico di Serlimar, cual minister Lopez-Tromp a comenta basta biaha den reunion publico. Pa cu esaki el a declara cu ta berdad cu el a haya un desastre masha grandi den e compania aki, como tambe no tabata mesun grandi manera Oduber a hay’e 3 aña pasa.

El a mustra un documento pa prensa, cu ta trata di e rapport financiero oficial traha for di compania Grand Thorton, di e cual el a bisa cu ta di e casa di minister Lopez-Tromp. E rapport aki ta di 14 di februari di 2020, e cual segun el a expresa, e mes a pidi’e pa traha for di october di 2019. Pa loke tambe a sigura cu ni un hende tin rapport, pa motibo cu minister Lopez-Tromp no a comparti esey. Di esaki, Bon Dia Aruba a haya for di un parlamentario mes cu nan si a haya e rapport aki.

Oduber a declara cu e motibo pa cual minister Lopez-Tromp no kier a comparti e rapport aki ta pa via cu e berdad ta sali eynan, den e rapport ta bisa con Oduber a haya Serlimar na aña 2014 y con el a lag’e na 2019, gastonan di personal di Serlimar cu a aumenta cu 35 hende mas cu na 2017.

Pa loke ta trata di e compania cu ta un Sui Generis, Oduber a menciona cu e compania aki cu 16 aña di existencia, gobierno di Aruba ta deb’e 72.177.000 florin, di e cual el a puntra dicon hende no sa esaki.

2018 y 2019 tabata e unico añanan cu excepcion, segun Oduber a comenta, na 2018 nan a haya 3 miyon adicional y 2019 no a haya nada den su balans.

“Desde 2014 Serlimar tin casi 200 trahado adicional cu Gobierno nunca a manda nada extra pa nan”, Oduber a bisa.

Pa finalisa, el a comenta cu si minister Lopez-Tromp tin acusacion e mester bin cu prueba. “Manera ami a presenta den conferencia di prensa, y no tir’e den halto, anto subi avion y bay. Aki no ta cuestion di corupcion of no, Oduber aworaki ta deal cu un investigacion den cual e ta duna tur espacio pa esey tuma luga y ora mañan tin un veredicto, tur hende lo condena”, el a comenta.