Recientemente Minister encarga cu Turismo Otmar Oduber a reuni cu CEO di Ahata Jim Hepple, pero no a trata e situacion cu tin entre nan di All Inclusive, cual a wordo cuestiona. Den un otro reunion recientemente a reuni cu sindicato di polis SPA, cual a lanta comentarionan cu e minister lo ta mete den presupuesto di otro minister. Sr. Oduber ta splica di e encuentronan aki y reaccionnan cu esaki a genera.
A haci Sr. Oduber e pregunta tocante e situacion entre e y Ahata, el a splica: “Den e ultimo simannan mi a ricibi 3 carta di nan abogado, cada uno nos a contesta nan cu contenido. P’esey mi a bisa siman pasa cu mi ta lamenta profundamente e posicion cu Ahata a tuma den su ultimo comunicado di prensa. Pasobra na un forma hopi transparente y cla, contrario na locual a wordo treci dilanti, di cu minister lo ta mete den presupuesto nan of cu minister lo ta esun cu ta determina’. Den e carta y documentonan cu a manda pa Ahata, ta mustra bon cla cu 100% di e decisionnan cu a wordo tuma den ultimo añanan pa loke ta fondo pa mercadeo, business plan, cuentanan anual, tur sin excepcion di un di nan a wordo sosteni pa e tres miembronan di Ahata, pues pa e CEO Jim Hepple, Tesorero Javier Wolter y pa ex presidente Ewald Biemas.” El a sigui splica cu ta sin excepcion ta wordo presenta na gobierno, presenta na Parlamento, cu firma di e 7 miembronan cu ta inclui nan. Ahata ta bisa cu e hendenan aki a actua riba nan mes, pasobra nan no ta representa Ahata. “E ora mi ta kere tin un problema serio den Ahata cu nan mester bay atende cu nan miembronan. Pasobra si na cierto momento bo ta nomina hendenan y despues ta bisa cu no tin confiansa den decision cu nan a tuma, e ora Ahata mester bay den nan mesun seno y mira e ora kico ta e problemanan cu nan no ta confia aparentemente esunnan cu nan a nomina.
Tur e decisionnan aki mi dirigi na Abogado Brown cu tur notulanan cu e miembro aki a aproba cada un di a cuentanan anual, cada un presupuesto di mercadeo etc. etc. contrario cu ta wordo bisa den e ultimo comunicado di prensa cu e minister lo ta determina na kico e fondonan di mercadeo ta tuma luga, esaki absolutamente no ta berdad. Tur di nan ta documenta y p’esey mi ta contento cu despues cu a haya contesta, nan ta bay nomina e 6 nombernan pa e tres posicionnan cu ta habri e siman aki, e mandatario a splica
Reunion SPA
Tambe a reuni cu presidente di SPA, cual a cuminsa cu e polemica cu minister ta reuni cu polis y pues ta mete den tereno di otro minister. Como cu e ta tarea di minister encarga cu husticia pa reuni cu polis riba aspectonan di siguridad.
Sr. Oduber a reacciona bisando cu si SPA ta pidi un minister reunion e no ta keda na ami pa nenga nan, e reunion no a wordo solicita pa mi persona y no cu mi ta haya esaki robes tampoco, como cu tin un preocupacion pa loke ta tuma luga cu siguridad den turismo. “Nos ta biba di turismo y mi a notifica esaki mil biaha y lo ripiti esaki mil biaha mas. E tarea di minister di turismo ta pa nos ta mas proactivo cu ta posibel pa evita cualkier tipo di casonan cu por bay lamenta di nan den futuro. Mi a bisa esaki for di mi posicion como minister di turismo y mi ta elogia cuerpo policial ora cu nan ta traha na un firma pa gara esunnan cu comete algo ilicito y ta gara un ladron. Pero esey pa nos ta un paso mucho laat caba. Nos mester evita cu e persona ey ta bira un ladron. Nos mester evita esaki pasobra e experiencia di e turista na momento cu e wordo atraca of ora tin tiramento, tiramento di boter etc. Cosnan cu no ta pas den un sector di turismo cu mester tin trankilidad manera cu na Aruba ta asina bon conoci y cu ta e “word of mouth”. Turista ta bay papia di siguridad di Aruba y con bon y sigur nos luga ta, ta di un indole importante cu mi no ta kere e ta ningun problema pa un minister di turismo duna oido na sea SA, Aruba Hotel & Security Foundation, sea ta na cuerpo policial den totalidad of ken sea cu ta pidi e atencion.”
Minister di husticia buscando fondo
Segun Minister tin un mocion di parlamento cu ta pidi e minister pa busca fondonan pa por yuda y sostene e empeño pa evita, no pa traha den coreccion, pues pa traha preventivamente cu fondonan pa sostene cu esaki no ta tuma luga. “
Tin fondo di ATA
“Hunto cu esaki a bin mocion di parlamento pa un plan integral wordo traha door di Minister di Husticia y di mi banda mi a splica cu ATA awe ta un identidad cu tabata costa gobierno 27 – 37 miyon pa aña, pero awe un identidad cu a debolbe gobierno casi 27 miyon florin. Kiermen fondo tin disponibel pa hinca den presupuesto y sostene esaki. Ya caba 7 ton of 8 ton pa aña ta wordo duna na AH&SF pa yuda KPA y den futuro, e ta den e beneficio di nos turismo pa nos por duna e sostene nan aki. Si e no kier wordo ricibi of tin problema pa encuentronan tuma luga, mi no ta kere ta e miho posicion. Mientrastanto mi tin bon cooperacion di trabou tumando luga entre SPA y KPA.”
Diferencia di opinion comienso di aña
Na comienso di aña tabatin problema entre Sr. Oduber y colega Minister encarga cu husticia riba e aspecto di siguridad, a puntra e mandatario con e relacion a bay awo cu algun luna a pasa. El a splica: “Siguridad nunca bo ta stop di ta preocupa pe. Siguridad bo kier pa tur momento ta bou control cual ta nos tarea. Parlamento y e minister den cuestion cual ta di husticia, na varios ocasion a mustra cu mester mas fondo disponibel. Nos a mustra di parti ATA cu kier pone fondo disponibel y mi ta kere cu na momento cu tin un plan integral manera cu mi a bisa cu fondonan di ATA por bay pa siguridad.” Pa ley fondonan di ATA no por wordo uza pa metanan cu no tin di haber cu turismo. Na e momento cu uza e fondo pa otro metanan, e minister ta responsabel y ta bay cera. Pues na e momento cu ta uza e fondonan ta uz’e responsabel manera cu a haci cu e 800 mil florin cu ta wordo duna via AH&SF, unda cu nan, hunto cu KPA mester presenta un plan integral pa e aña ey y nan ta ricibi e fondonan, Sr. Oduber a splica.
Finalmente, “pues si tin e necesidad di mas fondo y cu ATA por provee esaki semper y cuando e ta na beneficia industria turistico y siguridad di turismo, nos ta dispuesto pa yuda. Cada incidente cu tuma luga ta uno di mas, e ta cay den man den e companianan priva tambe cu mester percura pa siguridad riba nan propiedad no polis so.” E trahamento hunto no a bay miho, pero mi ta kere cu mester tin e meta en conhunto cu ta logra cu por cubri e responsabilidad cu mester cumpli den gobierno, p’esey ta keda reuni y haci locual cu por haci pa e industria di turismo, Sr. Oduber a termina bisando.
