Otmar Oduber: “Nan a corta garganta di Otmar y su negoshi cerando cuenta pasobra banconan tin monopolio pa por dicidi esaki”

Diamars corte di apelacion a cambia e sentencia inicial den caso di Aruba Bank contra Otmar Oduber y su negoshi Bochincha Container Yard (BCY) y a duna Aruba Bank. Ayera mainta durante un conferencia di prensa Sr. Oduber a reacciona ariba e veredicto aki ya a remarca cu esaki ta viola tratadonan internacional y derechonan humano.

Cu e veredicto aki nobo, Aruba Bank por nenga di habri of mantene un cuenta di banco habri pa Oduber pa motibo cu e ta un sospechoso den e caso flamingo. “Pa cuminsa mi tin cu bisa cu e decision aki ta sumamente decepcionante, pero sigur tambe mi no di acuerdo cu esaki tambe,” el a indica.

El a splica cu manera ta conoci den pandemia el a cuminsa un proyecto na Aruba di cual Aruba Bank ora cu e investigacion a cuminsa contra su persona, un investigacion cu e tempo ey tabata papia di corupcion, labamento di placa, enrikecemento ilicito y cu e tabata pertenece na organisacionnan criminal na Aruba, a cuminsa e proceso pa no habri un cuenta di banco pa su persona.

Na januari 2021 Oduber a bay corte di eerste aanleg y a gana e caso na unda cu Aruba Bank a habri e cuenta pa su persona. Despues di esaki Aruba Bank a apela e decision aki y a bay HOF y despues di dos aña y mey diamars ultimo Oduber a haya e decision den corte cu Aruba Bank ta haya e rason y cu si nan kier nan por cera e cuenta di banco sin problema.

“Na prome luga mi tin cu bisa cu e veredicto aki ta sumamente peligroso. E ta un veredicto cu no ta tuma den consideracion tratado- y derechonan humano internacional cu tur hende tin,” el a enfatisa.

Oduber ta señala cu e decision aki ta muestra cu e banconan na Aruba, cuater banco, tin e monopolio, pa por dicidi riba un persona cu no a wordo enhuicia ainda y cu su caso no a cuminsa ainda.

El a subraya cu e tratado internacional di derecho humano cu Aruba ta asocia cune cu ta rigi te dia di awe door di corte comun di Union Europeo cu ta bisa cu un hende ta inocente te ora demostra su culpabilidad, claramente no ta conta na Aruba.

E politico ta remarca cu den e caso aki su persona a wordo condena pa corte door di Aruba Bank sin cu tin prueba, sin cu tin un veredicto y sin cu tin un decision di hues cu ta bisa di e ta culpabel si of no. “Logicamente den estado di derecho cu nos ta biba den dje, un hende supuestamente lo mester ta inocente te ora wordo comproba bo inocencia,” el a bisa.

El a agrega cu den e caso aki un veredicto asina ta sumamente peligroso pasobra, por ehemplo, recientemente tabatin un caso di un gerente doño di un hotel grandi cu tabata sospechoso den un caso di un politico na Aruba.

Oduber a splica cu si, por ehemplo, nan a cera su cuenta y a resulta despues cu OM ta informa e persona cu no tin nada contra dje y ta liber di tur sospecha, esaki por ta hopi dañino pa e persona y su negoshi.

“E daño cu bo ta haci, e porta cu bo ta cera pa e ciudadano. Mi ta bolbe ripiti. Otmar Oduber no wordo condena, no a demostra cu tin ningun prueba contra dje. Otmar Oduber no tin ni un huicio cu a inicia ainda, e ta cuminsa otro siman, pero awe e derecho humano di cualkier ciudadano ta wordo bisa door di monopolio cu tin di banco aki na Aruba, cu banco mag di dicidi ken e ta duna un cuenta si of no, no ta importa si bo ta inocente of no,” Oduber a resalta.

E veredicto aki tin un consecuencia hopi pisa pa Oduber y su negoshi. E decision di Hof por significa tres cos pa Oduber; e tin cu cera su negoshi, e tin cu bende su negoshi of e ta significa cu e cu cera mi negoshi y bay for di Aruba.

“E negoshi lo tin cu cera of e negoshi lo tin cu wordo bendi, of e negoshi ta bay failliet. Den e momentonan aki bende un negoshi bao di e circunstancianan cu mi ta, ta dificil. Ken ta bay cumpra e negoshi si e doño ta wordo investiga, persigui manera cu ta sucede na e momentonan aki. Loke ta tumando luga aki no ta husticia ni imparcialidad den husticia,” el agrega.

Oduber ta señala cu e ta un causalidad cu despues di dos aña y mey cu Aruba Bank a apela y a bolbe cuminsa un caso dos luna y mey pasa, den dos luna y mey, despues di warda dos aña y mey, ta tuma un decision riba mesun dia cu HOF ta tuma decision tambe ariba un protesta cu el a entrega contra e citacion, hunto cu tur prueba.

E ex minister ta remarca cu e decision aki y e situacion cu e ta den por significa practicamente e final pa loke ta trata su negoshinan. Sin un cuenta di banco, el a splica, e no por paga BBO pasobra no ta acepta cash.

El a cuestiona con ta pone un comerciante maneha su negoshi sin tin un cuenta di banco y tin cu haci’e cash como si fuera ta labamento di placa tin.

“Awo nan ta manda mi bay haci negoshi na Aruba cash pasobra nos tin un monopolio caminda cuater banco ta dicidi riba un hende, dicidi si nan ta cera bo cuenta si of no. Banco ta haya door di hues e autoridad pa bisa cu por cera porta zo maar, bo tin cu kita e 100 hendenan cu bo tin, bo ta bay failliet, bo ta perde tur cos y bo no por bay ningun otro banco. Y tur esaki pa via di un caso cu a cuminsa cuater aña pasa,” Oduber a subraya.

El a enfatisa cu aworaki mas cu nunca e ley cu ta na Banco Central na e momentonan aki, cu Minister Geoffrey ta trahando riba dje mester drenta na vigor na Aruba. E ley aki, cu ya caba ta vigente na Europa, na establece cu no por nenga un ciudadano un cuenta di banco.