Otmar Oduber na Ministerio Publico: “Si mi no haya un contesta, mi ta bay back corte”

Dialuna mainta ex minister Otmar Oduber a tene un conferencia di prensa na unda el a duna un update ariba e investigacion di caso flamingo; un caso cu a cuminsa cu entrada hudicial na cas di Oduber dia 24 di juni di aña 2020.

Tres aña pasa, a inicia un investigacion contra ex minister Otmar Oduber basa ariba diferente acusacion y den luna di mei di 2022, Ministerio Publico a cera Oduber pa 23 dia. Caso Flamingo a cuminsa cu alrededor di shete acusacion, y despues a keda cu dos acusacion den su contra: estafa y soborno.

Manera ta conoci caba, parlamentario Marisol Lopez-Tromp a entrega keho oficial na Ministerio Publico contra Oduber, tambe alrededor di shete acusacion y na final un so a keda, cu ta e acusacion di spookambtenaar.

Den luna di januari, Oduber a tene un conferencia di prensa unda el a kibra silencio despues di tres aña cu caso flamingo a cuminsa y a indica cu e investigacion a culmina y e tabata en espera di e respuesta di e decision di Ministerio Publico.

Na november, Oduber a lanta un caso contra Ministerio Publico pa pone un termino pa e investigacion den su contra termina, pero Ministerio Publico a indica den corte cu e caso no mester sigui pa motibo cu e investigacion lo termina dentro di dos luna, esta memey di januari y lo tuma un decision si lo persigui Oduber of no.

Aworaki dos luna despues, ainda Oduber no a ricibi un contesta di Ministerio Publico: “Ainda nan no por bisa mi ‘tende Sr. Oduber nos ta bay hiba bo corte.’ Hiba mi corte anto, sikiera mi por defende mi mes y mi por caba cu e cos ki pa caba. Pero bo no por keda wanta mi hostage,” el a bisa.

Pa loke ta caso flamingo, Oduber a indica cu diaranson siman pasa su abogado a manda un ultimo carta pa Ministerio Publico na unda nan a duna Ministerio Publico un siman pa duna un contesta si lo persigui Oduber of no. Si e no haya un contesta, e ta bay back corte.

“Tres aña largo mi a wanta golpi di tur banda. Emocional, fisico, financiero; di tur manera.

Tres aña largo nan a caba cu mi caba, min tin nada di perde mas, pero mi ta kere cu si nos ta kere den un sistema hudicial, bo tin derecho. Pasobra e mesun ley ey ta proteha bo ora inhusticia ta wordo haci,” el expresa.