Otmar Oduber: “Mi ta contento cu awe tur hende, awo cu e incinerator a cay, ta realisa con importante e incinerator ta pa pais Aruba”

Durante su conferencia di prensa dialuna mainta, ex minister y poltico Otmar Oduber a toca e tema di incinerator na Parkietenbos. El a señala cu aworaki tur hende ta mira e importancia di un incinerator pa Aruba, un incinerator cu a ser cuestiona hopi den pasado ora cu e introduci’e.

“Mi ta contento cu awe tur hende, awo cu e incinerator a cay, nos ta realisa con importante e incenarator ta pa pais Aruba. Lamentablemente bo ta mira un minister awe cu no ta pone atencion na dje,” Oduber a indica.

El a splica cu na momento cu nan a introduci e maneho di incinerator, tempo e tabata minister, nan tabata papia di mas o menos 200 ton di desperdicio medico cu Aruba lo ta produci y a base di esaki a manda busca incinerator di e tamaño aki.

El a indica cu el a compronde for di Serlimar cu den tres luna di tempo e aña aki a surpasa e 200 ton aki caba di desperdicio medico y ta premira cu lo bay caba e aña cu alrededor di 600 pa 700 ton di desperdicio medico.

“Si no tabatin incinerator, unda e desperdicio medico aki lo a bay? Riba dump tira. Riba Parkietenbos cu tanto nos a critica y bisa cu nos mester cera. Kiermen e bista cu tabatin no tabata ni un bista corecto,” el a señala.

Oduber a agrega cu mesun situacion ta pasa cu e sludge. El a indica cu ta premira cu e cantidad di sludge cu ta ser kima den e incinerator, ta mas cu dobbel cu e cantidad cu a pensa cu lo tin of cu lo tabata bezig ta ser produci.

“Kico lo a pasa si e incenarator aki no tabata tey? E lo a ser mescla, esey ta loke tabata tuma luga, e lo a ser mescla cu e sushi na parkietenbos y cu ta ser dera y p’esey nos tabata mira e atake di muscanan, no higienico cu tabatin na cantidad, mescos cu e carcas di e bestianan morto,” el a remarca.

Oduber a enfatisa cu e ta spera cu pronto nan por drecha e incenarator aki y cu for di su punto di bista mester bin mas incinerator na Aruba. “Eynan ta caminda cu nos mester wak pa gobierno dirigi su nanishi den dje. No solamente pasobra nos tin mas sushi pa atende, pero bo ta genera mas fondo.”

El a splica cu e desperdicio medico ta genera placa pa esun cu ta maneh’e, den e caso aki pasobra mester paga pa tur desperdicio ser kima den e incinerator. El a señala cu clinicanan, oficialnan di dokter, abogadonan cu documentonan, banconan cu documentonan cu tabata clasifica y cu e por a compronde hasta droga na cierto momento ta ser kima y tur esaki tin un balor.