Ayera mainta e politico Otmar Oduber a convoca un conferencia di prensa pa asina trece dilanti su opinion tocante e hotel Secret’s Baby Beach y maneho cu tin na Directie Infrastructuur en Planning (DIP) na e momentonan aki.

E hotel, cual su construccion a bira di interes nacional debi na diferente caso cu a bin dilanti di parti di algun habitante di Sero Colorado, no contra e desaroyado mes sino contra Gobierno, tin un impacto enorme pa Aruba, manera Oduber a señala.

“Awe mi ta haya hopi falta di nos miembronan di parlamento y di otro politiconan cu ta activo pa puntra y cuestiona kico ta pasando cu e desaroyo di e hotel. Nos tur sa cu desde cu Lago a bandona Aruba den añanan 85 of 86, no tabata un gobierno sino tur gobierno cu a destina e area aki pa un desaroyo turistico, pa un hotel. Hopi intento a ser haci door di diferente minister di Turismo y na e momentonan aki lamentablemente bo no ta mira cu tin parlamento pa yama minister, e grupo y esnan cu ta responsabel pa mira kico ta pasando cu e proyecto aki,” el a sigura.

Oduber ta di opinion cu e proyecto aki a cumpli cu tur permiso y exigencia cu tabatin di parti di gobierno pa por ehecuta algo cu e pais tabata busca pa hopi tempo, y aworaki ta para cu un menasa pa pais Aruba. “E por tin un menasa di un claim sumamente grandi miyonario cu lo por tuma luga pa motibo no cu gobierno ta contra di e proyecto aki, no, pasobra nos a scucha di politiconan y parlamentarionan cu algun di nan ta contra e proyecto y aparentemente gran mayoria di San Nicolas ta pro e proyecto; pero den caso aki nos tin dos bisiña cu a busca nan derecho na corte y awe a compronde cu gobierno a contesta esaki y cu e desaroyado por continua cu e trabao.”

Igualmente e ta puntra su mes con parlamentarionan di partidonan como AVP, MEP, Accion21, MAS of Raiz no tin algun pregunta of un sosten pa un proyecto cu ta asina importante pa e pueblo di San Nicolas.

“Esaki ta e proyecto di mas importante pa e desaroyo di henter e bario y comunidad di San Nicolas pa loke ta trata empleo, economia spin effect cu esaki ta bay trece y esaki ta bira practicamente e solucion pa por crea un economia florecente pero lamentablemente bo no ta mira e atencion di parlamento,” Oduber a expresa.

Riba e topico aki el a pidi na Gobierno di Aruba pa sostene e desaroyadonan aki y percura pa conversa cu e dos bisiña unda bienestar general por permanece pa evita cu desaroyado lo pone un claim riba pais Aruba, lo por costa miyones y lo perde e oportunidad di un desaroyo pariba di brug.

“DIP a muri y a keda asina durante e ultimo 4 aña”
Oduber ken a duna su conferencia dilanti di Directie Infrastructuur en Planning (DIP) a bisa cu e departamento aki durante e ultimo cuatro aña “ta plat, DIP ta morto” un instancia cu ta como si fuera cu no ta existi y ta esun cu tin cu percura pa stimula economia di Aruba cu na e momentonan aki mester a yega na e punto cu tur atraso cu tabatin di peticion di tereno mester a keda cla.

Den esaki el a splica cu a bin un maneho publico conoci na comunidad unda ciudadanonan por a yega na remarca pa haya un tereno “pero cuatro aña desde cu Sra. Marisol Lopez-Tromp a tuma responsabilidad na 2020 di DIP e departamento practicamente a muri y a keda asina durante e ultimo 4 aña bao e minister cu ta encarga cu Infrastructura na e momentonan aki cu nos ta mira cu nada ta sucede.”

E realidad segun el a señala, ta e tuma di decisionnan cu mester tuma luga y ta su persona esun cu a implementa e maneho cu te dia di awe e departamento ta usa y e persona cu a ser nombra como director interino tabata su consehero tempo ora e tabata minister di ken awor e ta spera cu por mira cambionan den DIP.

Oduber a sigura cu economia ta pega pa motibo di loke ta tumando luga den DIP cu ta tranca y cu no ta sali ni un informacion for di Gobierno di Aruba of Parlamento pa purba yega na un solucion pa tur e permisonan, traspaso, entre otro, cu ta pega den departamento aki.