Manera ta conoci, entrante 1 di augustus ley di BBO na frontera a drenta na vigor. Durante su conferencia di prensa diamars mainta, ex-minister Otmar Oduber a toca e tema di e medida introduci y a remarca con e medida aki ta bay tin un efecto grandi ariba e pueblo consumidor.

“Nos no a sinti e peso ainda. Nos pueblo no por carga mas gasto, no por carga mas costo di bida cu a bin ta aumenta bao di tur gobierno. Keto bay nos ta mira cu e forma facil di purba tapa buraconan financiero ta door di aumenta costo di bida di nos hendenan y aumenta e gasto di haci negoshi na Aruba,” Oduber a expresa.

El a indica cu introduccion di BTW tabata e caminda corecto pa cana, pero no a hacie pa falta di curashi di parti di Gobierno di Aruba – y pa motibo politico ta mas facil pa introduci un BBO na frontera, cu ta genera miyones pa Gobierno di Aruba, pero cu ta empobrese y ta haci costo di bida di e hendenan mas dificil.

“E comerciante no por absorbe esaki mas, e tin cu pas’e door pa e comunidad y e comunidad simplemente no tin espacio mas pa por carga mas gasto,” el a subraya.

Durante e conferencia Oduber a señala cu el a haci un invitacion publico na Prome Minister y gobierno pa no introduci ningun otro medida y a pidi pa habri un dialogo nacional ariba con ta bay baha gastonan den gobierno, con ta bay reduci e gasto di personal y con ta bay baha e gastonan di coriente, awa etc.

El a menciona cu esaki ta posible door di entre otro privatisa, independisa y hasta elimina cierto departamento den gobierno cu na e momentonan aki no ta necesario. El a agrega cu pa loke ta trata nombramento di ambtenaarnan, gobierno mester saca esaki completamente for di man politico. Segun el a menciona tin rapportnan for di algun aña atras cu ya caba a mustra ariba e hecho cu esaki mester tuma luga.

“Laga nos tuma e decision awe, laga nos tin e curashi awe, oposicion y gobierno uni den un dialogo, hunto cu gremionan na Aruba prome cu e siguiente medida bin, prome cu nos haya nos cu un otro discusion ariba un aumento di prima di pensioen of riba un prima di AZV, of aumento na Serlimar of di awa, coriente, gas aki na Aruba. Laga nos haci un yamada na gobierno pa habri e dialogo social aki ariba e bahamento di gasto awe,” el a resalta.

E ex minister ta sigura cu tin hopi espacio den gobierno pa reduci gasto na un forma structural di cual tur aña gobierno por keda gana door di baha gasto y cu na cierto momento e por duna back na comunidad.

Oduber a trece pa dilanti tambe e punto di personanan indocumenta cu ta traha pero cu no ta contribui na e economia di Aruba. El a indica cu tin di 10 mil pa 12 mil persona indocumenta na Aruba, cu ta traha ilegal, personanan cu no ta contribui na AZV, cu no ta contribui na pensioen, cu no ta contribui na impuesto.

El a remarca cu si legalisa e grupo enorme di ciudadanonan aki den comunidad, esey lo brinda un espacio enorme pa, entre otro, e pensionadonan haya un reduccion caminda nan no mester paga pa loke ta trata e prima di AZV y otro impuestonan na Aruba.

“Sigui fia placa, sigui duna toeslag y regalo cu na final di dia ta keda costa e mesun pueblo no ta un alternativa mas pa e generacion aki of pa e generacion cu tin cu sigui,” el a enfatisa.

Oduber a subraya cu na final di dia gobierno a bin cu un BBO na frontera pa haya mas placa den caha di gobierno y e placa tin cu sali for di e comerciante of for di pueblo. El a splica cu e comerciante na su turno no tin espacio pa absorbe e e gasto y tin cu pasa esaki door pa e consumidor.

Segun el a señala, e percepcion cu por sigui presiona e comerciante, sigui pone medida riba e comerciante y purba pinta tur cos bunita, pero e realidad, el a remarca, ta cu gobierno bay genera entre 40 pa 60 miyon florin adicional. “Di unda e placa ta sali? E placa ta sali for di e pueblo, for di esun cu ta bay cumpra un paña, for di e esun cu ta bay cumpra comestibel pa e come, for di esun cu tin cu paga awe, coriente, etc. No tin espacio pa como politico nos tuma e pueblo aki haci mas.”

Oduber ta enfatisa cu e introduccion di BBO na frontera ta simplemente falta di curashi di e gobierno aki y gobiernonan anterior pa para tras di e proyecto di ley di BTW. El a indica cu na cuminsamento en berdad e tin un efecto inflatorio grandi, pero na final di dia, el a sigura, e ta hinca den saco di pueblo mas placa, mas disposicion pasobra tin un cantidad di reduccion ta tuma luga den e leynan fiscal.

“Cu BBO na frontera unico cos cu gobierno ta bay logra ta haya 40 o 60 miyon florin cu ta bay wordo saca for di pueblo atrobe mediante prijsnan cu ta bay aumenta,” el a bisa.

Oduber a enfatisa cu e introduccion di BBO na frontera ta bay sucede loke ya caba ta sucediendo y no cu e problema ta bay cuminsa cu BBO na frontera, pero e problema t’ey caba. El a remarca cu na Aruba tin un problema di presion ariba costo di bida di hende y e manera di biba na Aruba ta conduci na hopi problema social y na hopi problema mental

“No ta paso nos no tin criminalidad, no ta paso nos no tin ladronicia cu esey kiermen cu nos no tin pobresa, cu nos no tin presion social den nos comunidad,” el a resalta.