Ayera mainta, politico Otmar Oduber a tene un conferencia di prensa pa trece dilanti su opinion pa loke ta trata e ultimo declaracion di secretario di Estado Alexandra van Huffelen na Tweede Kamer y ademas el a papia tocante Serlimar.

“Mi no sa ni bisa si e ta un sorpresa pa nos, pero si e ta lamentabel cu a pesar cu ta sinti cu na e momentonan aki Aruba mas cu nunca mester a unifica pa por atende un situacion serio di finanzas pa nos pais. Cu nos ta sigui mira cu Hulanda si ta tuma su decisionnan manera cu ayera a ser anuncia den Tweede Kamer pa secretario di Estado di Hulanda, aki na Aruba ta como si fuera ainda nos kier wak ken tin mas forsa cu otro,” Oduber a menciona.

E ta continua bisando cu den parlamentonan e partidonan no ta sali afo y presta nan mes pa por yega na un solucion, caminda e prome minister Evelyn Wever-Croes a firma pa RAft pero e partidonan no ta duna di conoce kico nan opinion pa esaki ta, si nan ta para y sostene prome minister of no.

“Gremionan na Aruba, sali individual pa ataca gobierno of pa ataca parlamento pa bisa cu gremionan si unilateralmente pafo cu mester acepta RAft no matter si esaki ta kibra ariba e lucha cu tabatin di tur nos antepasadonan, awe por ta hopi hende den e politica nobo, e generacion nobo no ta corda con nos tabata biba 40 aña pasa, ora Corsou y Hulanda tabata dicidi riba nos cu e yamada cu tabatin tabata pa unifica e pueblo aki, gobierno, oposicion y gremio, no comunica cu otro via prensa, mientras tur esey ta tumando luga na e momentonan aki ayera den Tweede Kamer nan a duna nos 30 miyon florin adicional cu mester paga pa aña pa interes durante 20 aña pasobra no a yega ainda na un acuerdo.” El a bisa.

El a dirigi algun palabranan na prome minister pa asina unifica e pais aki y “yama tur hende na mesa” pa tur hende por mira ken ta willing pa sinta na mesa y para tras di un causa debi cu Hulanda a tuma su decision caba “ta keda na nos con nos ta bay atende cu e situacion aki.”

Den su opinion, si e tabata den gobierno na e momentonan aki su posicion tabata pa respeta e acuerdonan cu tin, cu ora e tabata forma parti di Gabinete Mike Eman 1 y 2 e gobierno no a cumpli cu compromisonan cu Hulanda “y lamentablemente e caminda cu mester a cana e tempo ey caba pa un BTW pa nos pais no a ser cumpli cune y cu ni un cantidad di otro compromisonan cu a ser haci cu Hulanda, awor cu e gobierno aki cu tambe mi a forma parti di dje cu tampoco ta cumpli cu acuerdonan cu tin cu Hulanda y esey tin nos den situacion caminda nos ta awe,” el a sigura.

Igualmente e ta sigura cu partidonan politico ta lubida di nan bandera y realisa cu durante 20 aña Aruba tin cu bay paga 600 miyon florin innecesariamente y cu por ta e partidonan ta pensando riba eleccion cu ta pa otro aña “pero na final di dia, ta 600 miyon florin nos por scapa cu bo sa cuanto bo por haci cu 600 miyon pa enseñansa, pa nos grandinan, pa salubridad akinan na Aruba?” e politico a expresa.

Biaha pasa den un otro conferencia di prensa, Oduber a pidi pa haci un dialogo social y tur hende por bin hunto y realisa cu nan por spaar gobierno cerca di 100 miyon florin pa aña, “pero mester kier, mester tin e cohon, mester tin e consenshi di bisa cu nos ta willing pa corta den nos mesun cuero pa nos por tin un miho salud financiero y un miho salud di nos maneho di nos pais, si nos no kier haci esey, si nos ta keda wak ken ta bay gana eleccion aki un aña e pais aki ta bay sigui keda bay caminda cu nos ta bayendo na e momentonan aki y mi ta kere cu nos ni un ta desea esaki,” el a afirma.

“Gobierno ta estrangula Serlimar”

Pa loke ta trata Serlimar el a bisa cu den tres aña cu tin investigacion ta tumando luga e gerencia nobo no tin den su man e rapport forensico cu a ser haci na 2019 y cuanto placa a paga pa gastonan di curator, contratistanan y consultant cu tin eynan pero cu pa e trahado mes di e compania aki no tin placa y cu ta den mesun caminda unda e tabata tres aña pasa debi cu e debe di belasting a sigui aumenta “gobierno ta estrangula Serlimar pa 15 miyon cu Serlimar no por a paga durante añanan y mi ta kere a subi te cu 17 miyon aworaki, pasobra no tin placa pero gobierno debe Serlimar 72 miyon, prome cos cu bo ta haci ta bay parlamento pa bisa cu nos ta debe na e compania 72 miyon y bo a bay perhudica tur e comerciantenan.”

Tambe el a trece dilanti cu den periodo di aña parlamentario cu a caba par di dianan pasa, no a bin dilanti un reunion na parlamento pa loke ta trata Medio Ambiente.