Henter nos comunidad tin e derecho y deber di participa

Diferencia di opinion semper por existi y hasta ta saludabel den cualkier discusion, tanten cu e opinion ta wordo scucha y respeta. Esaki no ta significa cu mester acepta e opinion, pero mester tin espacio si pa por ventila opinionnan contrario, sino nos ta cay den e mesun decadencia cu Paisnan rond di nos y hasta por ta peligroso pa nos democracia.

Cu gremionan y cualkier otro organisacion na Aruba tin e derecho aki ta indudabel, pero tambe nan tin un responsabilidad, mescos cu gobierno, di habri e avenidanan di dialogo na bienestar di nos comunidad. Lamentablemente nos ta mira cu na e momentonan aki di mas reto cu nos Pais ta enfrentando, no tin un hende, organo of instituto cu ta sali dilanti y lidera e esfuersonan pa uni e pueblo tras un solo meta na bienestar di e Pais. Gobierno mester compronde di su banda cu respet bo ta crea ora bo brinda esaki na esnan cu tin un diferencia di opinion y no atacando y purbando di silencia e opinion contrario aki.

Di otro banda gremionan y institutonan den nos comunidad tambe mester realisa e forsa cu nan tin como organisacionnan cu por para pa un diferencia si di berdad nan tambe uni tras un pensamento cu mente habri pa argumentonan di un gobierno na turno. E dos forsa aki, hunto tras un meta nacional, lo crea un respet di cualkier organisacion internacional y hasta gobierno di Hulanda. Un respet cu lamentablemente a bay perdi netamente pa motibo di e diferencianan y falta di comunicacion interno pa por enfrenta e retonan aki di Aruba. E forsa aki tras di e union di un pueblo lo wordo logra unicamente si tin un lider cu ta dispuesto pa pone tur interes personal, partidista of di un organisacion individual un banda y gara e bienestar general di e Pais y alinea tur organisacion tras e meta den comun aki.

Ex minister Otmar Oduber a finalisa cu un yamada un bes mas na tur partido politico den y pafo di parlamento, na gremionan comercial y sindical, na institutonan individual den nos comunidad y claro gobierno, pa uni y realisa cu e retonan cu awe nos ta enfrenta, no lo wordo supera si nos sigui cu e actitud tradicional. E actitud di ataca y purba score riba otro. Hulanda den esaki ta campeon, nan ta maestro den “Devide and Conquer”, dividi nos comunidad aki na Aruba y asina tuma decisionnan pa nos na Den Haag.

Ban uza e oportunidad aki pa pone diferencianan un banda pa hopi otro discusionnan cu nos por sigui delibera despues riba nan y concentra den un cumbre nacional riba e reto specifico aki di nos finanzas publico y reduccion di gastonan publico. Nos pueblo merece y tin un necesidad urgente na alivio den calidad y costo di bida. Y e momento ta AWO.