Ayera mainta, politico Otmar Oduber a tene un conferencia di prensa pa asina continua trece dilanti loke e ta considera como un falta di maneho y un peligro grandi e topico di gestion di desperdicio, e situacion di Serlimar y hasta e situacion di pensionadonan unda el a sigura cu na Aruba un di cada cuatro pensionado ta den pobresa.

Den esaki, el a trece dilanti un rapport di STAP ken ta un instacia experto den tereno di desperdicio e cual a haya opdrag di Corte di Aruba door di e gastonan cu ta andando di ciudadanonan cu a entama un caso contra Gobierno di Aruba “un situacion cu nos pais ta den dje, e preocupacionnan cu t’ey y naturalmente e consecuencianan pa futuro, nos dump di Parkietenbos a wordo cera, a boicotia un proyecto di incinerator cu mi persona tabatin e honor di pone eynan pa nos por drenta den un era nobo pa loke tabata trata maneho di sushi y e intencion tabata ta pa esey lo funciona pa un periodo unda cu mi mes tabata cera contract na Ser’i Teishi pa un periodo di maximo tres aña y nos ta bayendo na seis aña.”

Di esaki, el a splica cu ta creando un sero nobo di desperdicio na Ser’i Teishi cu no tabata den plan cu tabatin “pasobra tur hende ta corda cu e tempo ey a bay un destaho publico pa por a bin pa un incinerador grandi pa Aruba caminda nos ta atende cu desperdicio y cu esaki tambe tabata e solucion pa Serlimar por para riba su propio pia, ” Oduber a señala.

Den Oduber su opinion, e cartera cu na e momentonan aki ta pertenece na minister Ursell Arends ta un cartera unda “nada a wordo haci den tres aña y mey, ni riba tereno di medio ambiente, ni un ley a wordo treci dilanti a pesar di tur esnan cu a mi a laga atras den dos aña cu mi tabata minister di Medio Ambiente y Naturalesa. Nada a tuma luga. Desaster so riba tereno di Transporte y un ehemplo ta cu a traha 3 MB contra e taxistanan cu na final, un di nan ta contradeci otro pa bay na e maneho cu ya caba tabata existi.”

Pa loke ta trata RWZI , Parkientenbos y desperdicio di sushi el a comenta cu “awe mi ta kere cu gobierno a haya un bofta den su cara, ni un hende tin e rapport aki y porta sr Ursell Arends tampoco tin e rapport aki ainda, den dje ta indica cu incinerator tabata funciona fantasticamente bon, conforme tur normanan cu ta existi internacional pa haci un trabou corecto y bon na Aruba, por ta 100% biaha mas miho cu na Hulanda mes,” el a bisa.

Segun Oduber, den rapport aki ta menciona cu e sistemanan anterior tabata funciona basta bon y cu hasta lo no duna comentario riba e sistema cu tabata kima den container of den suela “pasobra e ta un berguensa y un tristesa e forma con tabata haci’e. No ta ami ta bisa, e rapport traha cu ta den corte ta bisa.”

Tambe a sigura cu e manera cu ciudadanonan ta sushando e pais aki, yenando di sushi tur caminda unda rapportnan di PAHO tabata mustra con salubridad den pais “ta den peliger” manera el a señala.

A menciona cu den eleccion anterior na 2021, unda partido Raiz a haya dos stoel pa parlamento di Aruba no tin mucho logro den parlamento, “nan a nombra famianan, nombra dos ruman den parlamento. Anto den gobierno e dos minister di e partido ‘nobo,’ generacion ‘nobo,’ puntra bo mes kico a bay bon pa loke ta trata e cartera di Sr Ursell Arends? Y puntra bo mes, kico a sosode cu economia di pais Aruba durante 3 aña y mey? Pensa y duna mi un logro. Anto nos ta papia di politiconan nobo, no, akinan nos ta papia di politiconan cu experiencia. E pais aki mester politiconan cu tin e cohon y balanan pa tuma decision.”

Tambe el a trece dilanti e topico di pensionadonan, caminda el a afirma cu “nos pensionadonan no merece e bida cu nan ta bibando na e momentonan aki.” Pa e topico aki el a bisa cu lider di partido AVP, Mike Eman “a lanta foi soño ora nos di Plataforma Pais na december di aña pasa a cuminsa papia di nos pensionadonan y nos a saca e cifranan di SVb, Banco Central y CBS unda a mustra e hecho cu despues di reunionnan cu nos a tene cu OPPA, hendenan a mustra nos cu un di cada cuatro pensionado ta biba den pobresa y nos tin 26.000 pensionado na Aruba.”

Igualmente, el a declara cu no por cobra belasting na pensionadonan mientras cu tin mas di 10.000 indocumentado na Aruba “cu ta trahando den tur skina pero nan no ta paga 1 florin ni na belasting, ni na AZV, ni na SVb.”

Aworaki cu campaña electoral a cuminsa mester wak ken ta traha, ken ta haci y “ken tin e cohon pa tuma decision pa trece cambionan den e pais aki y eynan bo ta pone bo confiansa.” el a bisa.

Oduber a condena publicamente cu “Forensic Aruba a traha un rapport riba opdrag di Marisol Tromp y un abogado, pa na 2020 un forensic onderzoek lo tuma luga na Serlimar y awe ta cuatro aña cu a pasa, e rapport ta cla masha rato y ni un hende kier sak’e, unda miembronan di parlamento ta pa pidi e rapport ey? Esnan responsabel pa loke ta sucediendo te dia di awe den Serlimar, ta e propio politiconan. 72 miyon florin Gobierno ta debe Serlimar te awe.”