Diahuebs atardi, manera a keda indica den nos edicion anterior, ex-minister Otmar Oduber a tene un conferencia di prensa na unda el a libra silencio, despues di tres aña tocante caso Flamingo, caso cu a cuminsa cu entrada hudicial na cas di Oduber dia 24 di juni 2020.

Inicialmente, manera Oduber a splica, caso Flamingo a cuminsa cu alrededor di shete acusacion, y despues a keda cu dos acusacion den su contra, estafa y soborno. Manera ta conoci caba, y segun Oduber tambe a recorda, parlamentario Marisol Lopez-Tromp a entrega keho oficial na Ministerio Publico contra Oduber, tambe aldrededor di shete y na final un so a keda, cu ta e acusacion spookambtenaar.

Oduber ta remarca cu a presenta un documento den su contra den cual ta indica cu el a duna tereno pa construccion di e hotel banda di aeropuerto y cu a duna tereno tambe na familiar, Venezolano, di e doño di hotel.

El a enfatisa, pa loke ta e proyecto di e hotel banda di aeropuerto cu a cuminsa na 2015, cu e tempo ey e no tabata minister di infrastructura mas, pues no tin posibilidad cu e por a haci locual tabata acus’e di dje. El a sigui indica cu banda cu e no e tabata minister, e tereno en cuestion, segun Oduber, ta indica ta un tereno eigendom tambe.

Ministerio Publico a insisti cu mester cera Oduber back pa motibo cu nan tabatin hopi testigo pa scucha den e caso ainda, y Ministerio Publico a pidi un total di 16 mas di extension, hues a duna ocho dia pa realisa tur interogacion necesario pa termina cu e parti aki di e caso.

Oduber ta enfatisa cu durante ningun di su interogacionnan nan a puntr’e tocante soborno, cu tabata un di e acusacionnan inicial di caso Flamingo.

“Kico a pasa, full caso Flamingo a cambia y bira un caso di rabia di Marisol. Esey so, nada mas. Boso sa kico ta mi suerte? Den dos aña cu mi tabata Minister di Infrastructura, tur e acusacionnan ta bisa cu ta Venezolanonan a paga pa haya tereno, Otmar Oduber no a duna ni un Venezolano un tereno erfpacht durante e dos aña ey,” el a subraya.

El continua bisando cu landsrecherche a drenta su cas riba un 24 di juni, y aworaki e caso di Flamingo a bira tocante un acusacion haci dia 24 di juli.

El a remarca tambe cu durante e dianan cu a pidi pa extension, un total 16 dia cu Ministerio Publico a haya pa motibo di COVID, un biaha so a interog’e y despues a lag’e liber riba e di cinco dia.

Oduber a sigui splica cu na momento cu el a sali for di KIA, di biaha el a entrega un keho back contra di Lopez-Tromp pasobra, segun e ta indica, e keho cu Lopez-Tromp a entrega den su contra ta basa riba mentira. “Den e caso aki nan a cuminsa kibra mi financieramente, daña mi negoshinan, perhudica mi negoshinan dramaticamente,” el a expresa.

Oduber a bisa cu na december ultimo autoridadnan a yam’e pa mas pregunta, pero ya no tabata mas tocante e keho di Lopez-Tromp, sino nan cuminsa puntr’e di un cantidad di diferente otro cos, cu segun e ta enfatisa, no ta cuadra.

Sr. Vito Carlo, abogado di Oduber a, a enfatisa cu aworaki ya no por yama e caso aki Flamingo mas. “Si yega asina leu cu e caso mester bay corte, e no lo ta caso Flamingo,” el a indica.

Pa loke ta e casonan pendiente cu ta involucra Oduber, Carlo a splica cu e casonan lo bin dilanti prome cu e wordo declara liber, e denuncia cu Oduber mes a haci contra Marisol Lopez-Tromp. Aworaki e caso ta den man di Ministerio Publico pa dicidi si nan ta persigui Lopez-Tromp of no.

Den e otro caso di Oduber ta mesun situacion, tin un denuncia di Lopez-Tromp contra Oduber, a haci investigacion y aworaki cu investigacion a cera, landsrecherche mester manda dossier pa Ministerio Publico y na su turno Ministerio Publico ta bay dicidi, riba e meritonan di e dossier, si tin base legal pa persigui Sr. Oduber.

Contestando pregunta di prensa tocante e declaracion di Prome Minister Evelyn Wever-Croes ken a declara durante conferencia di prensa cu algun di ex-ministernan di Infrastructura, entre nan Otmar Oduber, ta sospechoso den caso penal tocante corupcion di tereno y cu lo depolitisando DIP, Oduber a contesta: “Si Minister Presidente a declara esey, e sa algo mas cu mi anto.”

El a splica cu e no tin caso di sospecho contra su persona, relaciona na DIP en todo caso, pero si tabatin momento cu preguntanan cu a wordo haci pa loke ta su maneho tempo e tabata encarga cu e departamento en cuestion.

“Con bo por papia di depolitisa un departamento si tur siman bo ta reuni cu e hefe y dun’e instruccion, y no por otro pasobra ta e Minister ta responsabel pa ley. E no tin sentido pa depolitisa, si tanten cu no privatisa, independisa e departamento, e minister ta keda politicamente responsabel pa e departamento,” el a enfatisa.