Otmar Oduber declara culpabel di fraude, intento di fraude y abuso di su funcion

Ayera tardi, Corte den Prome Instancia a duna su veredicto den caso Flamingo. Actual parlamentario y lider di fraccion PPA, Otmar Oduber, ken ta e sospechoso principal den e caso aki, a ser declara culpabel.

Despues cu hues a dicta su sentencia, fiscal di Ministerio Publico (OM) Patrick van der Biezen, a duna su declaracion na prensa den cual el a splica cu Oduber a ser acusa di diferente hecho castigabel.

Tabatin un total di cinco acusacion, cu tabata trata diferente caso, entre otro fraude, estafa y tambe maluso di su poder como minister e tempo ey. Hues a indica cu e ta haya cu a ser legalmente y convincentemente proba cu Oduber a haci su mes culpabel di estafa. Hues a indica tambe cu e ta haya cu por declara prueba e parti di fraude den caso di entrega di tereno Malmok y e caso di spookambtenaarnan.

Di otro banda tin cierto acusacionnan cu a haya vrijspraak den e caso aki, manera entre otro den e caso di yiu homber di Oduber y Sra. Esser.

Un punto importante cu fiscal van der Biezen a menciona ta e hecho cu hues a trece dilanti y a splica bon cla, prome cu a bay den e contenido di caso, cu OM ta ser declara admisibel den e caso.

El a sigui splica cu e defensa di Oduber a trece diferente biaha dilanti, cu OM, Landsrecherche, BCI, lo a falsifica documentonan, cu a tene documentonan atras y cu tin denuncianan falso cu a ser haci. Hues a splica cu tur esaki a ser bari for di mesa y a hasta bisa cu e no ta haya ningun sosten den e dossier pa esey sostene e acusacionnan aki di e defensa.

“Esey pa nos ta importante pasobra ta confirma trabounan cu nos ta haci, pero tambe autoridadnan cu ta haci investigacion, BCI, Landrecherche etc. ta traha manera debe ser y na unda cu hues awe ta confirma esey den e decision cu ta bisa cu OM por wordo declara admisibel den e persecucion contra Sr. Oduber. No ta asina mescos a wordo treci dilanti tur e biahanan ki cu lo ta inventa of cu tin un persecucion politico, absolutamente cu no,” vVan der Biezen a enfatisa.

Pa loke ta e castigo, e fiscal a splica cu hues a haya ta na su luga, cual el a resalta ta diferente na e punto di bisa di OM, a base di tur e pruebanan cu tin, cu Oduber tin cu haya un castigo di 365 dia di prizon di cual 319 dia ta condicional, y un tempo di prueba di tres aña. Esey kiermen cu 46 dia, cual el a sinta caba, esey e ta hay’e como castiggo incondicional di prizon.

Esaki ta nifica cu Oduber no mester bay KIA.

Ademas di e castigo di prizon hues a dicta cu Oduber ta haya castigo di trabou comunitario di 240 ora y si e no cumpli cu esaki e ta haya 120 dia cera. Tambe hues a haya cu Oduber mester haya, cual ta algo cu OM tambe a pidi, un bijkomende straf cu ta kita e derecho pa por traha den un funciona publico, como ambtenaar y tambe ta kita e derecho cu comunidad di Aruba por vota p’e den un cualkier eleccion pa un periodo di tres aña.

Fiscal Van der Biezen a subraya cu e sentencia den caso Flamingo un biaha mas corte ta confirma, y manera cu hues a bisa y OM a trece dilanti tambe den su rekisitorio, cu tipo di casonan aki ta trece desconfiansa den pueblo.

“Na momento cu bo ta haya personanan, mandatarionan cu ta sinta den posicionnan clave y cu ta mal usa nan funcion, cu ta comete estafa unda cu ta perhudica pais Aruba, ta perhudica otro ciudadanonan pa beneficia otro personanan cu ta conoci, amigo of campañador etc. Y esey ta mina confiansa cu nos mester tin, cu comunidad di Aruba mester tin den e mandatarionan. P’esey atrobe na momento cu OM haya nos mes cu tipo di casonan asina ta nos obligacion segun ley pa trece tipo di casonan aki dilanti na unda cu e normanan aki cu ta wordo bisa, manera defensa ta trece dilanti cu ta cultura of algo normal, ta confirma cu no ta normal y ta cos cu no ta suppose di pasa,” el a enfatisa.

Por ultimo van der Biezen a indica cu OM tin cu evalua aworaki y studia e veredicto pas asina tuma un decision tocante si ta bay apela of no cierto di e sentencianan cu hues a dicta ayera tardi.

Sospechoso principal, Otmar Oduber, a expresa cu e sentencia aki ta uno “zoet zuur”, pero tabata toch satisfecho cu hues a constata un di e puntonan mas importante cu su defensa a trece dilanti na mas di un ocasion. E punot aki ta cu OM a cuminsa cu un “monster di caso” den cual, den palabra di Oduber, tabata pin e como e “capo di caponan”, pero hues mes a bisa cu OM a presenta un caso cu tabata hopi mas suave cu loke nan a indica na principio.

Oduber, cu emocionnan cu e no por a contene mas, a gradici Dios pa e sentencia di vrijspraak cu su yiu homber a haya. Pero na mesun momento tabata un poco desapunta cu toch su integridad a ser cuestiona den full e periodo aki.

E parlamentario a splica cu no ta compronde con e por haya vrijspraak den e caso di fraude pasivo, hues a constata cu no a haya niun placa, niun privilegio niun regalo, pero si por a prueba cu a laga dos persona, dos spookambtenaar, cobra mientras cu no tabata traha.

Di otro banda e di dos acusacion cu tabatin tabata e acusacion di terenonan na Malmok. Dos tereno den 1,800 tereno na Malmok, cu segun Oduber na final no a ser entrega. El a splica cu den e tratamento di e caso, como no por a prueba cu a entrega e terenonan, OM a bisa cu si tabatin intencion di entrega e terenonan aki.

El a agrega cu den e caso aki no ta dos tereno so a ser duna como uitzondering, pero ta mas di 80, un lista cu nan a presenta pa mustra cu no tabata privilegio pa ningun hende .

Oduber a indica cu ta bay evalua, ta bay pensa aworaki cu su ekipo y famia tocante kico lo bira e siguiente paso, si ta bay apela of no.

El a splica cu su funcion den parlamento tambe ta depende. El a remarca cu e ta un persona cu semper a para pa su palabra y dependiendo di e pasonan cu e tuma y lo reuni cu partido PPA ariba esaki. Ya caba prome cu el huramenta como parlamentario el a reuni cu e partido, pero aworaki cu tin sentencia aki lo bay back den partido pa dicidi kico ta e proximo paso, dependiendo di kico e dicidi.

“Mi ta keda di opinion, tanten si tin un condena, si tin un straf, mi ta kere cu den parlamento, si nos kier duna respet na e organo aki mester por cuminsa na nos mes, esey ta e cambio den politica cu nos ta buscando,” el a resalta.