Un reunion entre Aruba Trade & Industry Association (ATIA) conhuntamente cu otro gremionan y e politico Otmar Oduber a tuma luga dialuna ultimo, pa asina trece dilanti diferente preocupacion cu tin den comunidad di Aruba. Entre otro, Oduber a duna su critica tocante e cobransa cu ta bay tin pa turista na aeropuerto, cu e fondonan ta bay ta dirigi pa RWZI y Directie Luchtvaart Aruba.

Minister di Medio Ambiente Ursell Arends a anuncia mediante un tratamento di presupuesto di aña 2024 na Parlamento di Aruba cu a tuma luga na december riba e proceso di kico ta bay e caminda cu nan ta bay tuma pa privatisa RWZI, ademas el a informa cu un concepto di ley a bay na Raad van Advies pa despues por bay na sala di parlamento.

Pa loke ta e contenido di e ley mes, minister Arends mediante un entrevista cu Telearuba a informa cu e suma cu nan ta papiando di dje pa cobra na turistanan ora ta drenta Aruba ta di 35 dollar den cual ta inclui den dje e fondonan pa privatisa RWZI, 20 dollar ta bay pa loke ta trata inversionnan cu mester haci pa traha un RWZI nobo y tambe pa cambia e sistema di riolering cu tin na Aruba cu tin aproximadamente 50 aña bieu, “kiermen ta bay rekeri inversionnan cuantioso y e manera con e fondonan aki ta bay ser cobra ta ora e turista ta yega aeropuerto e fondonan ta ser cobra pa cabes y ta bay dedica na e proyectonan cu nos a asigna.”

Minister Arends a sigura cu pa loke ta trata e otro 15 dollar ta bay ta pa privatisa Directie Luchtvaart Aruba, caminda Aruba tin cu cumpli cu tratadonan internacional y despues di conversacionnan cu nan tabatin cu Organization Internacional di Aviacion Civil (ICAO) a dicidi cu esaki ta e miho manera pa bay cune pero mester dialoga cu trahadonan y sindicatonan.

Pa Oduber e anuncio aki di minister Arends no a cay den bon tera y ta “onteigening,” pa motibo cu segun el a sigura, “bo ta cobra e turista den caso aki pa algo cu no tin di haber cu e pertenencia of e atraccion di un turista pa bo isla, e ta simplemente e manera mas facil pa bo genera placa pero e consecuencianan por bira uno masha grandi mes,” el a afirma.

Igualmente, den reunion aki Oduber a puntra na Tisa Lasorte CEO di AHATA si nan ta haltura di esaki y si tin un estudio, “pero no tin ningun estudio, tempo nos a introduci por ehemplo e room tax, el a tarda lunanan y añanan di estudio y conversacionnan a tuma luga cu tur a partners internacional prome cu nos lo a introduci’e.”

“Na momento cu bo ta bay cobra un Directie Luchtvaart Aruba, 15 dollar y 20 dollar pa RWZI, pa cabes, pa algo cu no ta un responsabilidad di e turista, pone un presion riba e turista siendo cu pa un famia di 4 of 5 hende, bo ta papiando di casi 180 dollar cu tin cu ser paga na porta di pais Aruba pa algo cu ta onteigening, si bo kier AHATA pagel’e como e doño di e camber cu ta huur e turista, ta un otro cos, si ta pidi un contribucion for di aeropuerto of aerolineanan pasobra Directie Luchtvaart ta e inspector di e leynan cu nan mester obedece na dje, ta un otro cos.” Oduber a señala.

 

ATIA “un dialogo nacional por duna un resultado na un economia mas fuerte”

Den reunion di Oduber cu ATIA y otro gremionan a trece dilanti cierto puntonan dilanti manera director Herrick Henriquez di ATIA a señala, cu nan tambe ta di acuerdo pa bin cu un plataforma y un dialogo, den e topiconan di e reunion tambe a trece dilanti e parti di labor, problemanan den turismo, entre otro.

“Nos a papia tambe di e plataforma cu e kier crea y nos tin cu bay wak con leu esaki ta yega, sigur e ta un reto pero a mi ta sigur cu si nos traha riba dje , nos por yega na un dialogo manera Sr. Oduber kier,” Henriquez a bisa.

Como gremio comercial ora ta papia di economia di Aruba mester tene na cuenta tur e factor cu esaki tin manera empleado, doño di trabou, gobierno y tur di nan tin cu forma parti di economia segun Henriquez ta sigura, “tin cosnan cu si ta pa drecha bo economia, ta cosnan cu nos tin cu sinta hunto, conversa, dialoga y e meta ta pa un miho futuro pa e isla, e aña aki pa labor ta un di e puntonan importante cu nos tin cu bay riba dje y 100% e obstaculo esey tambe ta bay kita, dus e burocracia tin cu bira menos, nos tin cu bin cu ideanan pa yuda nos comerciantenan pa nan sa mas riba e belasting cu tin y otro punto ta adulto mayor cu tambe ta importante, un dialogo nacional por duna un resultado na un economia mas fuerte.”

Pa Oduber den e reunion aki, a mustra interes di ambos banda pa por yega na puntonan cu pa hopi aña ta bin papiando di dje, “por ehemplo, e cambio di ATA pa bira Sui Generis tabata un exito pero aworaki, 12 aña despues a yega momento pa cuminsa planea y papia riba e cambio di rumbo di e maneho cu mester tin den proximo 15 of 20 aña, loke tabata prioridad na 2011 pa lo cual ATA a ser lanta , awe por ta a shift y mester atencion diferente,” el a expresa.